Shillong, Jylliew 20: Ka Sorkar Jylla kala dep ban aiti iaki jaka sha ka National Highways and Infrastructure Development Corporation Limited (NHIDCL) bad ka National Highways Authority of India (NHAI) ba kin sdang pyntrei noh iaka Shillong-Dawki Road Project.
Ia kane la pyntip da u Symbud Myntri Rangbah ka jylla ba khmih ia ka Tnad PWD (Roads) bah Prestone Tynsong uba la ithuh ruh ba ka kadei ka kamram jong ka NHIDCL ban buddien bad ka tnat kam Pohïing ka Sorkar Kmie ban ioh ia ki jaka ha Contonment (jaka shipar ha Upper Shillong) naka bynta ban sdang trei noh ia ka surok 4-Lane na Rilbong sha Upper Shillong.
“Ngam tip hynrei kadei ka kamram jong ka NHIDCL ban buddien bad ki Shipai ban ioh iaki jaka ba kan sdang noh iaka surok 4-Lane na Rilbong sha Upper Shillong namar katkum ka jingioh jingtip ka Sorkar Pdeng (Delhi) kala mynjur ban ai jaka ban shna surok” ong u bah Prestone haba iakren bad ki nongthoh khubor.
U bah Prestone u iathuh ba ia kane ka Project la aiti sha ka NHIDCL bad iaka surok naduh Guwahati, Jorabat, Shillong bad Sonapur la aiti sha ka tnat NHAI bad kine ki tnat kin sa jubab shaka tnat Ministry of Road Transport ka sorkar pdeng.
U bah Prestone ula iathuh baka sorkar jylla kala iatreilang bad ka Ministry of Road Transport ka sorkar pdeng haba iadei bad ka jingpyntrei ia kine ki surok bad naka liang ka sorkar jylla kala shim khia ruh ban iakren bad ka NHIDCL bad NHAI ban pynthikna ba ka jingpyntrei ia kine ki surok kam dei ban wanrah jingthut haka iaid ka ieng ki kali bad paidbah.
Haba kylli halor ka jingtwa khyndew ha Sonapur Tunnel, u Symbud Myntri Rangbah ka jylla ula iathuh ba mynta ka kynti ki stad na nongbah Delhi bad na IIT kila wan eksamin iaka Sonapur Tunnel naka bynta ban shim rai kumno ban pynbeit ia kine ki jingshah ktah haka twa khyndew jan man ka por ba ther u lapbah.
“Ka don ka jingthmu ban pynneh slem iaka Sonapur Tunnel bad dei namar kane ka sorkar pdeng kala phah daki stad na Delhi bad IIT ba kin wad bniah bad ban bishar kumno ban pyllait ia kane ka Tunnel naka jingshah ktah haka jingtwa khyndew” ula ong.
Nalor kane u Symbud Myntri Rangbah ula iathuh ruh baka sorkar kala bthah iaki ophisar ka tnat NHIDCL ban long kiba phikir bad ban pynbiang iaki lad jingiada bad ba kin treikam baroh 24 kynta hapoh ka thain surok Rngain ka ba dang mad ka jingtwa khyndew dang shen.
“Ka jingtohkit ba khlad 2 ngut ki rangbah ba twa khyndew ha Rngain ka dang iaid bad naka liang ki Pulit bad u IO shen kin sa phah iaka kaiphod shaka sorkar ban leh iaka ba donkam” la iathuh u bah Prestone.
