“Dei u mawmer ban sah khana” ong ka HNLC ba ai jingthuh ka Google ia ka ktien Khasi

Ther ia ka Sorkar Pdeng bym ithuh noh ia ki ktien riewlum ka Meghalaya

Shillong, Naitung 01 : Ka Hynniewtrep National Liberation Council (HNLC) ha ka sngi Nyngkong, kala ai jingiaroh ia ka rai jong ka Google ban ai jingithuh ia ka ktien Khasi haba thalain ia ka Sorkar Pdeng halor ka jingbym lah ban pynrung noh ia ka ktien Khasi bad Garo ha ka khyrnit ba phra jong ka Riti Synshar ka Ri India.

Ha ka kyrwoh, u General Secretary-cum-Publicity Secretary Sainkupar Nongtraw ula ong “Ka HNLC ka kmen eh ban pynbna ia ka jingai jingithuh ba dang shen ia ka ktien tynrai jong ngi da ka Google, kaba pyni ia ka jinglong kongsan ban iada bad lehkmen iala ka ktien ka thylliej ba hiar pateng la pateng. Ka jingithuh ka pyni ia ka jingpyrshang jong baroh ban iakhun ha kaban ioh noh ia ka jingithuh da ka Sorkar India ia ka ktien jong ngi”.

U Bah Sainkupar ula ban ba ka long kaba kongsan ia ka Sorkar India ban ai jingithuh bad kyrshan ia ka ktien tynrai jong ngi, kaban lah pynkhlain ia ka riti dustur, kan nang kyntiew ia ka bha ka miat ka Jaidbynriew bad noh synniang sha ka thong ban iada ia kane ka ktien ka thylliej.

Ha kawei ka liang, une u Nongialam ka HNLC ula ong ba ka jingkyrpad ba dang shen jong u Myntri Rangbah ka Jylla ia ka Google ban ai jingithuh lem ia ka ktien Garo kala pynsngewkhia shibun halor ki kam ba u shimkhia.

“Ka long kaba kongsan ia u Myntri Rangbah ban pynleit jingmut ha kaban kyrpad ia ka Sorkar Pdeng ban kynthup lang noh ia ka ktien Khasi bad Garo ha ka khyrnit ba phra ha ka jaka ban pyrshang leh ia ka kam ban pynmyntoi shimet” ula ong.

Haba ther ia ka jingpynslem ka Sorkar Pdeng ban ai jingithuh ia kine ki artylli ki ktien ka Jylla, u Bah Sainkupar ula ong “Ka jingbym lah jong ka Sorkar ban ai jingithuh ia ki ktien tynrai jong ngi ka pyni ia ka jingthmu ban tyllep, pynduhjait bad pyndkut ia u saibteng jong ngi ha ka tynrai da kaba pyndkoh ia ka jinghikai bad pyndonkam iala ka jong ka ktien ka thylliej”.

Ula ong ba napdeng ki 7000 tylli ki ktien kiba la kren ha satlap ka pyrthei bad napdeng ka 700 tylli ki ktien ha India, ka ktien Khasi kala ioh ia ka jingithuh da ka Google Translate. Kane ka dei u mawmer ban sah jingiathuh khana.

Haba iadei bad ka ktien ktien, u Bah Sainkupar ula ong ba ka UNESCO kala ai jingithuh ha u snem 2012 ia ka ktien Khasi kum ka ktien kaba don jingma ba lah ban duh jait noh.