“Dei tang ka Sorkar NPP kaba shimkhia shisha ban pynbeit pud bad ka Assam” : Gavin

Shillong, Rymphang 10 : U MLA ka NPP na Sohra u Bah Gavin M Mylliem ula ong ba dei tang ka sorkar kaba ialam da ka seng National People’s Party (NPP) kaba la nud ban shim ia ka rai rangbah ban pynbeit ia ka jingiakajia pud bad ka Assam kaba la sahteng la bun phew snem.

“Kane ka mat ka dei kaba la sahteng naduh ba ka Meghalaya kala ioh ia la ka jong ka jylla hynrei dei tang hadien ba ka sorkar kaba ialam da ka NPP kaba la shim ia ka rai kaba tyngeh ban pynbeit ia ki 6 tylli ki jaka na ki 12 tylli kiba don hapdeng ka jingiakajia bad ka Assam,” ong u Bah Gavin haba kren ha ka jingialap elekshon ban pan jingkyrshan ia u kyrtong ka NPP na Langkyrdem-Laitkroh u Bah Rahboklang Tynsong, ha ka jingialang kaba la long ha Laitlyngkot-Nongkynrih ha ka sngi Saitjain.

Ula ong, ba ka sorkar jylla kala thaw ia ki Regional Committee ban wad ia ki lad ki lynti ban pynbeit ia u pud u sam kham kloi.

“Ngi dap da ka jingkmen ba ngi lah pyndep ia ka jingiasoi ia ka MoU na ka bynta ki 6 tylli ki jaka kiba iakajia pud, kaba la iasoi hapdeng jongu Myntri Rangbah ka Meghalaya bad u Myntri Rangbah ka Assam ha ka jingdonlang u Myntri Kam Pohiing ka ri u Amit Shah (ha ka 20 tarik u Lber 2022 ha New Delhi),” ula ong.

“Ngim lah ban kyntait ia ka jingshisha ba kan don beit ka jingiohnong bad ka jingduhnong hynrei kaei kaba kongsan kadei ba ngi pyrshang ban pynbeit ia kane ka mat ban pynthikna ba kan don ka jingsuk kaba neh ha ka thain khappud” ula ong.

Nalor kane, u MLA ka NPP Sohra ula ong ba kane ka sorkar kaba mynta ka phaikhmat bha ruh ha ka liang ka pule puthi.

“Watla ka jingshisha ka long ba ngi mad ia ka jingeh kaba khraw ha kane ka liang hynrei ka sorkar jylla kala shim ia kiba bun ki sienjam ban pyniaid ryntih ia ka pule puthi” ula ong haba bynrap “Ha kaba iadei bad ki kam nonghikai kiba thylli ha ki skul sorkar, kaba la sahteng la bun snem namar ka jingdon hapdeng ka jingbishar jongka iingkashari, kadei kane ka sorkar kaba la mudui sha ka High Court bad kumta ka iingkashari kala shah ban thep kam na ka bynta kitei ki kam kiba lait. Ha u snem 2021, ngi lah iohi ba da ki hajar tylli ki kam kiba lait lah dep ban pyndap bad kane kala ai jingmyntoi ia ki samla pule bad ki samla khlem kam khlem jam”.

Ula kyntu ia ki paidbah ba kin ai jingkyrshan kaba pura ia u kyrtong ka NPP bad ula ong ba ka EC kaba ialam da ka NPP ha KHADC kala mynjur ia kiba bun tylli ki Bill na ka bynta ban iada ia ka jaidbynriew kaba pyni ba ka seng ka don ia ka jingthmu ban shakri ia ki paodbah bad ia ka thain baroh kawei.