Shillong Jylliew 22: Ki pulit ka Mawlai Police Station, ha ka sngi u Blei kila iohkem ia 3 ngut ki samla ba kynthup ia kawei ka khynnah kynthei, kiba donkti ha kaban pajut ia ka jingdeng soh skhor na ki khynnah skul kynthei ha ka thain Mawlai.
U Superintendent of Police ka ka East Khasi Hills Bah Vivek Syiem ula pyntip ba kine ki laingut ki runar ki kynthup ia ka khynnah kynthei kaba dang 16 snem ka rta, u Mabanker Jyrwa (23 snem) ba shong ba sah ha Jaiaw Lansonalane bad u Charles Myrthong (20 snem) ba sah ha Riatsamthiah.
Da kane ka jingiohkem kane ka khynnah kynthei kala leit ialam lynti ia ki Pulit sha ka dukan die ksiar kaba la tip kum ka New Oscar Jewellers Shop kaba don ha Mawbah, bad ioh ban kurup ia baroh ki jingdeng ksiar.
Kat kum ka jingiathuh une u Heh Pulit, ki Pulit ka Mawlai Police Station kila iohpdiang ia ka ejahar ha ka 18 tarik Jylliew na ka kong Elinda Marbiang ba sah ha Mawlai Nongkwar, kaba pyntip ba ha kane ka janmiet hapdeng ka por 1:30 haduh 2 baje, katba ka Khun ba dang 9 snem, ka dang wan na skul, kawei ka kynthei kala buddien ia ka naduh ka lynti iaid kjat na Wahumkhrah.
Ka iathuh ba kane ka briew kala leh mynleh ban kylli shaphang uwei pat u khynnah ba kyrteng u Adrian, uba pule ha ka klas II ia kaba ka khun kala jubab ba kam tip eiei.
U iathuh ba kane ka kynthei kala buddien ia ine I khynnah haduh ha Mawlai Nongkwar Block-II bad kala ktah ia ki skhor ine I Khynnah bad hadien kala pajut jubor ia ki soh skhor hashuwa ban phet krad na kane ka jaka.
Ki Pulit ka Mawlai Police Station kila register ia kane ka case hapoh ka Mawlai PS Case No 61(6)2025 bad pynngat hapoh ka kyndon 304(2)/115(2)/351(2) BNS.
Une u Heh Pulit u iathuh ba ha ka 20 tarik Jylliew ruh, ki Pulit kila iohpdiang ia ka ejahar na ka kong Sumardiam Kharlukhi ba na Mawlai Nonglum, kaba pyntip ba ha kane ka janmiet por 4 baje-4:30 baje eiei, 3 ngut ki briew ki bym lah ban ithuh kynthup ia kawei ka kynthei bad 2 ngut ki shynrang, kila wan rung sha ka Iing jong ka katba ka Khun Kynthei ba dang 9 snem, ka dang ialehkai habar.
U iathuh ba ha kane ka jingjia ruh, kane ka kynthei kala ot jubor ia ka jingdeng soh skhor bad phet bak na kane ka jaka.
Ia kane ka jingjia ruh la register case ha Mawlai Police Station kat kum ka awlai PS Case No 62(6)2025 bad la pynngat ia ki hapoh ka kyndon 304(2)/3(5) BNS.
Ka jingtohkit ia kine ki 3 ngut ki runar kala iaid shakhmat.
