Nongpoh, Naitung 05 : U MLA ka Jirang Constituency Bah Sosthenes Sohtun, ula dawa ia ka Tnad Forest ka Assam, ba ka dei ban pyllait noh mardor ia uwei u rangbah ka shnong Belahari, uba kala kem dang shen.
Une u rangbah ba shah kem ha ka Tnad Forest ka Assam, u dei uba tip kyrteng u Bah Bakstar Diengdoh. Ia u bah Bakstar la kem naduh u bnai bala lah.
Haba iakren bad ki lad pathai khubor, u Bah Sosthenes ula pyntip ba ula dep pyntip ia kane ka jingjia sha u Myntri Rangbah ka Jylla Conrad K Sangma lem bad sha ki bor ka Sorkar Jylla ba kin iakren lem bad ka Sorkar Assam ba kin pyllait noh ia u Bah Bakstar ba un wan phai noh shala iing.
Kat kum ka khubor ba ioh lum, ka Tnad Forest ka Assam kala kem ia u bah Bakstar naduh u bnai bala lah na ka Ophis trei kam katba u dang leit mih ia ka jingshah khot.
U Bah Sosthenes ula pynrem jur ia kane ka jingleh ka Tnad Forest bad ula kynthoh jur ba kane ka jingleh kane ka tnad na Assam kala pyni shai kdar ia ka jingbym burom ne khein snep ia ki nongshongshnong ka Meghalaya ha khappud wat hapdeng ka jingiakren pynbeit pud kaba dang iaid hapdeng ka Meghalaya bad Assam.
Ula ong ba kane ka tnad ka dei ban pyllait noh ia une u rangbah khnang ba kan don ka jingshongsuk shongshngain ha khappud.
