Shillong, Naitung 16 : U Nongialam ka BJP bad MLA ka South Shillong Bah Sanbor Shullai, ha ka sngi Ba-ar ula dawa ia ka Sorkar Jylla ba kan pynkiew noh ia ka Discretionary Grant (DG) jong ki MLA sha ka T.20 lak.
Haba iakren bad ki lad pathai khubor, u Bah Sanbor ula ong “Ha ka por ba nga dang long MLA nyngkong ha u 2008, ka song pisa ka dang dei tang T. 3 lak bad hadien la pynkiew sha ka T. 5 lak bad mynta kala kiew sha ka T.10 lak shisnem. Dang shen ha ka jingialang bad u Lamphang ha ka jingiadonlang u Myntri Rangbah bad Symbud Myntri Rangbah, nga la ai jingmut ban pynkiew noh sha ka T.20 lak naduh u 2025”.
Ula ong ba kane ka song pisa ka dei kaba mang iaki MLA ba kin lah ban ai jingiarap song pisa ba donkam kyrkieh ia ki paidbah, kiba donkam jingiarap, hala ki jong ki jong ki constituency.
“Baroh ki MLA ki hap ban aiti ia ki Utilization Certificate ha ryngkat ki Bill khnang ba kin ioh ia ka song pisa” ong u Bah Sanbor haba bynrap “ Ka shong ha uwei pa uwei u MLA kumno ban pyndonkam ia ka song pisa na ka bynta ki paidbah jong ka constituency lane shabar ka constituency jong ki”.
Kat kum ka jingong jong u, ki MLA kim lah ban ong ba kim lah ban ai ka jingiarap song pisa sha ki paidbah.
“Ka jingthmu jong ka DG bala ai sha baroh ki 60 ngut ki MLA ka long ba kin ai jingiarap song pisa ba kyrkieh sha ki paidbah. Lada ki MLA kim kwah ban pyndonkam ia ka song pisa, ki lah ban thoh sha ka Legislative Assembly, ba pynpaw ba kim kwah satia ia ka song pisa” ula bynrap.
