Shillong, Naiwieng 23 : U Working President ka UDP Bah Paul Lyngdoh hynne ka sngi Balang ula dawa ia u ma Lahkmen Rymbui ba un hiar shuki noh mardor kum u Myntri kam Pohiing ka Jylla namar ka jingbym lah ban ai jingiada ia ka jingim jong ki paid nongshongshnong ka Jylla.
“U (ma Lahkmen) dei ban shim ia ka jingbahkhlieh da kaba hiar shuki noh mardor kum u Myntri kam Pohiing namar ba um lah ban ai jingiada ia ki paid nongshongshnong ka Jylla” ong u Bah Paul haba iakren bad ki nongthoh khubor.
Kane ka jingdawa kala mih tang shisngi hadien ba san ngut ki briew kila shah siat iap ha ki Pulit ka Assam hynnin ka sngi ba-ar ha shnong Mukroh, West Jaintia Hills District.
U Bah Paul ula ong ba u ma Lahkmen ula pyni ba um lah satia ban treikam ha baroh ki liang kum u Myntri kam pohiing ka Jylla.
Hynnin ka sngi ba-ar, u ma Lahkmen hadien ba wan iuhkjat ha Mukroh, ula ai ka jingbatai ia ka jingjia sha ki Nongialam ka Party UDP ha ka jingialang bala pynlong da u President ka UDP Bah Metbah Lyngdoh.
U Bah Paul ula buh jingkylli ruh halor ka jingkren u ma Lahmen ba um don bynta jingbahkhlieh halor ka jingther kuli ki Pulit Assam ha Mukroh.
“Kumno ki paidbah na Meghalaya kin shah siat iap hala ka jong ka Jaka? Bad kumno u Myntri kam Pohiing u lah ban thet kti da kaba ong ba u khlem phah siat bad ba kam dei satia ka jingbahkhlieh jong u?” ula buh jingkylli.
U Bah Paul ula ong ba u ma Lahmen um don hok shuh ban iai bteng kum u Myntri kam Pohiing ka Jylla.
