Dawa u Dr Mukul ban thung ia ka jingtohkit halor ki jingkynnoh ka Congress pyrshah ia ka NPP

Shillong, Nailur 09: U Nongialam ka Liang Pyrshah u Dr Mukul Sangma hynne ka sngi Nyngkong, ula iengskhem halor ka jingdawa ban thung da ka kynhun tohkit kaba laitluid halor ka jingkynnoh ba kala don ka jingpyndonkam da ka pisa be-ain na u Droks, jingtih dewiong bad ka jingai kam kontrak da ka National People’s Party (NPP) kaba ialam ia ka sorkar jylla.

Ka jingdawa u Dr Mukul Sangma, kadei kaba la pynshong nongrim halor ka jingkynnoh u Nongialam ka Congress bad u MP barim ka jylla Bah Vincent H Pala ba ka NPP kala pyndonkam da ka pisa be-ain ban khring ia ki MLA na kiwei pat ki seng sain pyrthei.

“Ia kino kino ki jingkynnoh, ngim lah ban shu sngap jar. Ngam tharai ba ki jingkynnoh dei ban shu klet noh, namar ba ki jingkynnoh kila mih. Kumta kadei ban don ka jingtohkit kaba laitluid haduh kaba kut, ban pynngeit ialade ba hooid, ki jingkynnoh kim long kiba shisha ne ka bym dei. Uno uno u lah ban pynmih ia ka jingkynnoh bad wat lada ki jingkynnoh ki long kiba shisha ruh ki lah ban lait”, ong u Myntri Rangbah barim ka jylla haba iakren bad ki nongthoh khubor.

Ula ong, “Kam pher hynrei ka rukom treikam jong ngi ka dei ban long kaba pher bha. Ka kam jong nga, ka long ban pynbor ia ka Sorkar India ban thung ia ka jingtohkit kaba laitluid. Nga shai kdar halor kane. Kaei kaba ki ong, kaei kaba kiwei ki ong bad kumno ki pyrshang ban ïada ïalade, ngan kyntu ïa ka sorkar India ban tohkit bniah lyngba ka jingtohkit kaba laitluid.”

Haba ïadei bad ka jingjia ha kaba kawei ka jingkieng ka la twa ha rilum Garo ryngkat bad ka trok kaba kit shini, ula ong, “Namar kata, dei ban tohkit ïa kine kiei kiei baroh namar kine ki dei ki kam runar ha shilynter u pud u sam bad kawei pat ka ri. Ki don bun kiwei pat ki jingtip kiba nga la ioh, ba ki kam runar kila jia ha ki thain khappud. Ngi don ka kabu ban don ha ka sorkar la slem bha ha ki kyrdan bapher bapher. Mynta lada kino kino ki kam be-aiñ ki jia ha kylleng ki khappud, sngewbha long kiba thikna ba kam dei tang ha kawei ka kam hynrei kan long palat”.

Ula ong, ba kam don jaka ban shu hun haba iadei bad ki kam be-ain ha shi lynter ki khappud bad kiwei pat ki ri.

“Sngewbha long kiba husiar, ngi dei ka jylla kaba don hajan bad u khappud uba iar bad kawei pat ka ri, kumta kam dei ban don ka jaka ban sngewhun ha kaba iadei bad ka jingshimkhia jong ka Sorkar India halor kino kino ki mat kiba ïadei bad ka jingleh be-aiñ ha shi lynter u pud u sam bad kawei pat ka ri. Kim lah ban sngap jar bad ngam khmih lynti ruh na ki ba kin sngap jar. Nga khmih lynti ba kin shimkhia mardor ban bad nga don ia kiba bun ki daw kiba nga dei ban ngeit” ula pynpaw.