Shillong, Jylliew 05 : U Nongialam ka Liang Pyrshah bad Myntri Rangbah barim Dr Mukul Sangma ha ka sngi Palei, ula dawa ban pynlong biang da kawei ia ka written exam jong ki kam bapher bapher ba lait ha ka Tnad Meghalaya Police hadien ka jingkynnoh bymlah jong ka Central Recruitment Board (CRB) ban iaid kat kum ki kyndon ban pynthikna ïa ka jingleh hok ha ka jingpynrung kam baroh kawei.
“Ngan sa thoh sha u Chairman ka CRB Meghalaya Police halor kane ban pynthikna…ba dei ban pynlong biang da kawei ia ka written exam ban thungkam pule ha ki kyrdan bapher bapher” ong u Dr Mukul haba iakren bad ki nongthoh khubor.
Kane ka jingdawa jong u kala mih hadien ba ka CRB ha ka 3 tarik Jylliew kala pyllait ia ka kyrwoh ba kyrpad ia ki kyrtong ba iakhun ba kin aiti ia ki aplikeshon, ki jingujor, ki mudui, ki jingthoh lane kino kino kiba iadei bad ka written test ha lane shuwa ka 6 tarik Jylliew, 2025, ia kaba u ong ba ka long pyrdet ia ka jingpynbna ba pynmih ha ka 6 tarik Lber 2024, kaba la kren shai ha ka para 18 – “Ki kyrtong ki lah ban shah kyntait ha kano kano ka bynta jong ka jingpynrung kam namar ka jingbym iaid kat kum ka rukom treikam bala buh/ bym ai pura ia ki jingtip/ jingtip ba bakla/ jingbym pynbiang pura ia ki syrnot/ka jingpynpaw bakla ia ki jingshisha bad kiwei kiwei bad dei ban leh eiei kat kum ka ain ha kum kine ki jait kam”.
Ka CRB ha ka kyrwoh khubor kala ong “…Naba ia ka written test la pyndep pura, ka Ophis ka CRB ka don jingthmu ha kaban bishar bha ia ki answer script bad OMR sheet jong baroh ki 9 tylli ki centre thoh eksam, da ka jingthmu ban pynkloi ia ka kam ban lah pynbna kham kloi ia ka result. Hynrei, namar ka jingwan ki jingkyrpad ban pynbeit ia ki aplikeshon bala pyndap bakla ia ki roll nombor, series bad kiwei kiwei, ki kam kila suki noh”.
“Mano ba khot ia kine ki aplikeshon?. Hato ka don kano kano ka kyndon ia ki kyrtong ban ai ia kino kino ki jingthoh haba iadei bad kane ka bynta? Hato ka Recruitment Policy ka shah ia kane” buh jingkylli u Dr Mukul.
“Ngam pat ju iohi ia kum kane ka jingthungkam kaba la pynjakhlia da kum kine ki jingtuklar. Ka dei ka jingtuklar ha ka jingpynrung kam baroh kawei. Mano ba ai ia kane ka hukum sha u Chairman jong ka CRB lane hato ka dei ka rai jong u shimet?. Hangno la pynpaw ha ka notice ba ki kyrtong ki bym shym la ai ia ki roll nombor kiba dei lane kiwei kiwei, ki lah ban ai da ka jingthoh ban pynbeit pat” ula buh jingkylli.
Une u Myntri Rangbah barim ula kynnoh ba ka Sorkar kala pynwan ia kum kine ki rukom treikam ba kan ioh thungkam ia ki briew lajong bad kiba ki mon ha ka jingthungkam baroh kawei. Kane ka jingjia kala pynmih ia ki jingkynthoh bapher bapher ha ki social media”.
“Nga la pule lut ia ki jingkynthoh kiba mih na ka kyrwoh khubor jong ka CRB ha kaba kila mih ki jing kynnoh ba ki don ki briew ba dei ap eksam ha ka por ba don ka written ecam, la shem ba kila iarap ia ki kyrtong ba thoh eksam? Ula ong haba dawa ia ki bor khmih ba kin shimkhia ia kum kine ki jingkynnoh.
