Shillong, Nohprah 22 : U Myntri Rangbah ka Jylla Conrad K Sangma hynne ka sngi palei, ula dawa ia ka All India Trinamool Congress (AITC) ban panmap halor ka jingkynthoh pynjah burom ia ka deiriti ka Jylla Meghalaya bad ia ka riam tynrai jong ki paid Khasi.
Ula kynthoh ia kane halor ka jingthoh ha ka twitter jong u Nongialam ka AITC Kirti Azad uba la buh ia ka dur jong u Myntri Rangbah Narendra Modi ba u phong ia ka riam tynrai ki Khasi ha ka jingwan iuhkjat ha Shillong bad ong ia ka “Ym ithuh ba dei u shynrang ne kynthei, u idei tang kum u nonglehniam ha kane ka riam ka beit”.
U Conrad ula ong ba kane ka jingkynthoh une u Nongialam ka TMC ka long ka jingibein ia ki paidbah ka Jylla khamtam ia ki Jaidbynriew Khasi.
Haba thalain tyngeh ia une u Nongialam halor kane ka jingkynthoh ba ktah ia ka jingsngew uba bun balang, u Myntri Rangbah ula ong ba ka Party ba u mihkhmat (AITC) kan hap ban panmap halor ka jingibein ia ki paidbah ka Jylla bad ia ka deiriti jong ki.
“KI Nongialam jong kane ka seng sain pyrthei ha Jylla ki dei ban panmap bad une u briew uba kynthoh ia kane ruh u dei ban panmap halor kane ka jingkren ibein pyrshah ia ki paidbah ka Jylla bad pyrshah ia ka deiriti jong ki Nongshongshnong ka Jylla” ula dawa.
