Guwahati, Iaiong 03: Ki party liang pyrshah ka Assam hynnin ka sngi U Blei ki la kynthoh tyngeh Ia ka sorkar synshar BJP ha Assam da kaba kynnoh ba ka la don ka kam bamsap ha kaba iadei bad ka jingai Ia ki kam kontrak ha ka jingpyntrei Ia ki lynti flyover ha ka sorbah Guwahati.
Ka seng Congress, Raijor Dal bad ka Assam Jatiya Parishad (AJP) ki la dawa ban pynlong da ka jingtohkit kaba bniah halor kane ka jingkynnoh kaba iadei bad ka ka jingpyntrei Ia ka Super Market flyover.
Haba kren sha ki lad pathai khubor, u nongaiktien ka seng Congress u Manjit Mahanta u la kynnoh da kaba ong, “Ia ka Super Market flyover la plie paidbah ha ka 4 tarik Naiwieng 2021 da u Myntri Rangbah (CM) Himanta Biswa, bad katkum ki khubor la ong ba haduh T. 45 lak la pynlut tang na ka bynta ka jingialang plie Ia kane ka flyover. Hynrei Ia ka tender ha kaba iadei bad ka jingplie la khot naduh jan san bnai hadien ba la plie Ia ka, bad Ia ka work order la aiti sha u kontraktor hadien hynniew bnai. “ Na ka liang u Mahanta u la kynnoh ba ka kompeni kaba la ioh Ia kane ka kontrak ka don ka jingiadei bad ka longiing longsem jong u CM Sarma.
Na ka liang u vice president ka Raijor Dal u Rasel Hussain u la ong ba ka Enforcement Directorate (ED) ka dei ban pynlong ka jingtohkit halor kane ka jingkynnoh lada ki shlur ban leh.
“Ngi dawa Ia ka jingtohkit ba laitluid halor kine ki jingkynnoh, ” Ong u Hussain. “ U nongaiktien ka AJP u Ziaur Rahman u la ong ba ka long kaba sngewkyndit shibun ba Ia ka tender la khot San bnai hadien ba la pyndep Ia ka kam.
“Tang lyngba ka jingtohkit kaba laitluid lyngba u nongbishar ka highcourt kaba lah ban lap Ia ki jingshisha baroh, bad kane ka dei ka jingdawa ka jong ngi, ” U la Ong.
