Shillong, Jylliew 21: Ka Hynniewtrep Youth Council (HYC) ha ka sngi Palei, kala dawa ban phah pynphai biang ia baroh ki tin sop ing bala pynpoi daka Company na West Bengal sha bun ki C&RD Blocks hapoh ka Jylla bad bad pynsangeh ia ka jingsam sha ki paidbah.
Haka shithi sha u Myntri Rangbah ka Jylla Conrad K Sangma, u President ka HYC Roykupar Synrem ula ong baka seng kala pynlong ia ka jingtohkit bad shem ba ka tnat Directorate of Housing, Meghalaya kala thied ia ki tin ki bym bha satia bala wanrah bad pynpoi daka Company ‘Hariana Iron Works Pvt. Ltd, Kolkata, West Bengal’ kaba dei ruh ka Company ka bym don bynta ban shna ne supply ia ki tin ing katum ka profile jong ka Company.
“Katkum ka jingtip bala ioh, ka Directorate of Housing kala thoh sha ka kane ka Company ban pan tin ‘Corrugated Aluminium Roofing Sheet AA3105H18 Alloy ba 8 phut ka jingjrong, 800MM ka pyngkiang & 0.45MM ka jingrben’ kum ba ju la leh man ka por. Ka jingrben 0.45MM kadei kaba biang bala sam shaki longing ha ki snem bala leit noh hynrei haba ka Seng ka tohkit katkum ka jingujor na kiba bun balang la shem ba ka jingrben ki tin ka long tang kumba 0.25MM ka bym iahap satia wat ban tap ia ki sem ri jingri khlem da iakren ia ki iing briew” ula ong.
U Bah Roy ula ong ba namar kane ka kam ka don bynta bad ka jingpynlut ia ka pisa u paidbah, ka HYC ka dawa ban pynlong ia ka jingtohkit ia baroh ki kam naduh kaba thied ban pynpoi ia kine ki tin ba tad dor kaba long pyrshah ia ka kyndon bala buh da ka Tnad Housing nalor ban tynrong ruh ia ka jingkitkhlieh ia ki briew kiba donkti.
Ula dawa ruh ba dei ban leh eiei pyrshah ia u Director ka tnat Directorate of Housing ka Sorkar Meghalaya, ki nongthied lane ki ophisar kiba don bynta ha kane ka jingthied tin ing da ki ba tad dor bad ula ong ruh ba ka Hariana Iron Works Pvt. Ltd, Kolkata, West Bengal’ kadei ban shah khang lane Blacklist ban don bynta ha ka pynpoi tin hapoh ka Jylla bad dei ban shim sienjam ba tyngeh katkum ki kyndon ain.
Nalor kane ula ong ruh ba dei ban leh eiei pyrshah ia ki Block Development Officer(s) lane iaki officer jong ki C&RD Blocks kiba pdiang iaki tin sop ing ba pynpoi daki nongsam khlem da pynthikna iaka jingbha ki tin.
“Lada ym leh eiei halor kane ka jingdawa, ka seng kam banse ban shim da kiwei ki sienjam ban pyrshah ia kane ka jingleh bakla jong ka Sorkar, ki nongsupply bad baroh ki briew ba don bynta namar kane ka thew ruh sha ka jingpyndonkam bakla ia ka pisa u paidbah ne ka ‘Jyrsieh’ ” ula ong.
Nalor kane u President ka HYC ula kyntu ban thung da ki Nodal Officer ba kin leit ban jurip bad pynshisha iaka jingbha jong ki tin kiba la pynpoi sha ki C&RD Blocks hapoh Khasi-Jaintia Hills.
