Shillong, Jymmang 16: Ka Meghalaya BJP kala bynniaw jur halor ka kynrum kynram bad ka jingsajia jong ki samla ba iakhun iaka eksam CUET ha Centre kaba don ha NEHU bad dawa ba ki nongpyniaid ki dei ban ai ia ka jingpynshai kaba sngewhun halor ka jingshah lehbein ki samla.
Ka BJP kala byrngem ba lada ym lah ban ai jingpynshai kaba pynhun, ka party kan rah ban iakren ia kane ka kam bad ka Sorkar ban pynthikna ia ka jingpynshitom kat kum ka ain pyrshah ia ki nongpyniaid ba thurmur.
U Nongaiktien ka Meghalaya Arnab Das ula ong “Ka mynsiem jong ngi ka leit sha ki samla pule bad ki bahaiing hasem kiba la mad ia ki jingsajia bym lah thew hashuwa ka eksam, ngi lah ban mutdur ia ka jingkyndeh bad jingkhuslai kaba wan hap ha ki. Ki samla pule ki donkam ban shong thoh eksam da ka jingmut jingpyrkhat kaba jai jai bad kane ka jingjia ka lah ban ktah bha ia ki samla ban lah thoh bha ia ki jingkylli”.
“Ka long kaba eh ban mutdur ba kumno ia kat kane ka eksam kaba kongsan bha lah pyniaid ha ka rukom kaba thurmur bha. Ngi dawa ia ka Tnad Education ba kan khmih ia kane bad ban leh eiei pyrshah ia ki nongpyniaid ia ka CUET” ong u Arnab Das.
