New Delhi, K’lyngkot 11: Ha ka review meeting halor ka Bodoland Territorial Region (BTR) Agreement kaba la long ha New Delhi hynnin ka sngi ba Ar, na ka liang u president ka All Bodo Students’ Union (ABSU) u Dipen Boro ula dawa na ka bynta ka jingpyllait noh ia u Ranjan Daimary.
U Piyush Goyal uba dei u Additional Secretary ka tnat Home Affairs jong ka sorkar pdeng ula wan iashim bynta lang ha kane ka review meeting kaba iadei bad ka Bodoland Territorial Region (BTR) Agreement ha New Delhi.
Nalor kata u Paban Kumar Borthakur uba dei u Chief Secretary na ka bynta ka sorkar Assam ruh ula iadon lang ha kane ka jingialang kumjuh u CEO ka BTR u Pramod Boro.
U Dipen Boro uba dei u president ka ABSU, uba la iadon ryngkat lang ha ka jingialang ula rah ia shibun ki mat kiba dei na ka liang jong ka seng.
Nalor ka jingdawa ban pyllait noh ia u Ranjan Daimary, uba dei u nongseng jong ka kynhun kieng atiar National Democratic Front of Bodoland (NDFB), na ka liang u Dipen Boro ula dawa ruh ban pyntreikam noh ia baroh ki mat kiba iadei bad ka BTR agreement kat haduh u snem 2024.
Shuh shuh u Boro u la kyntu ruh ba ia baroh ki jingmynjur ne agreement dei ban pyntreikam noh pura kat haduh k 31 tarik u bnai Lber u ban wan.Nalor ka jingdawa ban pyllait noh ia u Daimary, u president ka BSU ula khot ruh na ka bynta ka jingpyllait noh ia baroh ki briew kiba la shah rai set phatok junom.
