Shillong, Nohprah 28 : Ka Achik Conscious Holistically Integrated Krima (ACHIK)- Tura Unit, kala ujor sha ki Pulit ba dawa ban leh tyngeh pyrshah ia ki kam khaii tuh sha Bangladesh lyngba ka Tura ha West Garo Hills.
Ka jingujor bala aiti ha u Officer-in-charge ka Tura Police Station ha ka 27 tarik Nohprah, 2025, ka dei kaba la leh hadien ka jingiohi bad jingiathuh ki briew ia ka jingdon kawei ka trok kaba khaii bun bah ki kombor sha Bangladesh.
Ka shithi ujor ka ong ba ha ka miet 27 tarik Nohprah, ki dkhot ka ACHIK kila iohi ia ka trok ba don u nombor AS01-TC-9745 ba kit smam da ki kombor, kaba iaid lyngba ka thain Araimile.
U nongniah, haba tohkit, ula iathuh ba kine ki mar ki dei kiban leit sha Mahadeo, South Garo Hills hynrei hadien ula phla ba ki kombor ki dei kiba thmu ban khaii tuh sha Bangladesh.
U nongniah ula pyni ruh ia ka mobile phone ba pyni ia ka jingshah lum khajna beain, kaba pynbor ia ka kynhun ban dawa kurup ia kane ka mobile na ka bynta ka jingtohkit.
“(Namar kata) ngi dawa ia ki Pulit ban pynshisha ia ka thymmei bad ka jaka ban leit pynpoi ia kine ki mar, ban tohkit ia ka E-way bills, ki kot ki sla GST, ki Invoice, ki transport permitbad ban leh eiei kat kum ka ain lada shem ia ka jingpynkhein ain” ong ka ACHIK.
Kane ka seng kala pynpaw ia ka jingsngewkhia halor ka jingduhnong ha ka khajna bad ka jingshngain ka ri, haba pynpaw ba kum kine ki kam beain ki lah ban pynkhlain ia ka ioh ka kot jong ka rib a marjan lyngba ki kam beain ha kum kane ka por ba jur ka huri hura ha Bangladesh.
Ka pyntip ba ka Tura Police Station kala kubur ba kala ioh pdiang ia ka shithi ujor bad la khmih lynti ba kan pynlong ia ka jingtohkit kaba bniah halor kane ka kam khaii tuh ba beain.
- Tura Unit, kala ujor sha ki Pulit ba dawa ban leh tyngeh pyrshah ia ki kam khaii tuh sha Bangladesh lyngba ka Tura ha West Garo Hills.){kind=link}