Dawa ki Trai kali kit maw /shyiap ban pynshai ia ki Ain khang tih marpoh khyndew

Sangeh kamai ki kali kit maw bad kit shyiap naduh ka 5 tarik

Shillong, Nailar 05: Ki trai bad nongniah kali kit kit maw bad shyiap kiba don hapoh ka lama jong ka Associaton Hima Mylliem and Hima Khyrim Local Truck Owner and Driver Association, East Khasi Hills, kila dawa naka Sorkar ba kan pynshai paidbah halor ki kyndon jong ka Meghalaya Mineral (Prevention of Illegal Mining Transportation and Storage) Rules, 2022.

Haba kren shaki lad pathai khubor, u President ka Association Bah Egenstar Kurkalang ula ong ba ka jingbym shim khia jong ka Sorkar ban pynsngewthuh iaki kyndon jong ka Meghalaya Mineral (Prevention of Illegal Mining Transportation and Storage) Rules, 2022, ka buh jingeh iaki trai par bad trai kali kit shyiap kit maw.

Ula iathuh ba ka jingpyntreikam kynsan jong ka Sorkar iaka challan, kala pynlong iaki trai kali ban duh ei iala ki kali lane hap siew kuna namar ka jingkloi ki ophisar ka tnat khlaw ban kurup iaki kali khlem da pynbna bala pyntreikam iaka ain.

“Ka jingpyntreikam jong ka Sorkar Jylla ïa ka kyndon The Meghalaya Mineral (Prevention of Illegal Mining Transportation and Storage) Rules, 2022, ka la pynlyngnoh ïa ka kynhun namar kam don satia kano-kano ka jingpynshai halor ka jingpyntreikam ïa kane ka kyndon kaba ym long ban kit maw kit shyiap khlem ka Challan” ong u Bah Egenstar.

U Bah Egenstar ula ong ba kane ka jingleh kynsan kynsan ka Sorkar kala pynlong syndon iaki trai par bad trai kali ban sangeh ïa ki kali kiba kit maw kit shyiap naduh mynta ka sngi ka 5 tarik u bnai Nailar 2024.

Ula pyntip baka kynhun kan pynlong daka jingialang haka 8 tarik mynta u bnai hapoh ka shnong Umphyrnai ban ïakren bad ïatai halor kane ka aiñ khnang ba ki kali kiba ïaid bad kit ïa ki mar, kin nym shah pynthut ha lynti ha syngkien.