Shillong, Lber 16: Ka synjuk ki Nonghikai, ki Samla Pule bad Nongtrei ka North Eastern Hill University (NEHU) kila dawa ba dei ban pynsangeh ia ka jingai tulop ia u Vice Chancellor, Registrar bad Deputy Registrar ka NEHU namar kim pat shym wan trei bad ka jingpep jongki kam dei satia kaba kila da ioh jingbit na ki bor kiab dei khmih.
Kine ki synjuk ba kynthup ia ka North Eastern Hill University Teachers Association (NEHUTA), North Eastern Hill University Non Teaching Staff Association (NEHUNSA) bad ka North Eastern Hill University Students Union (NEHUSU) kila phah da ka jingthoh sah u Acting Vice Chancellor ka NEHU Prof N Saha ha ka 13 tarik Lber ba un bat ia ka tulop kine ki lai ngut.
Kine ki kynthup ia u Vice Chancellor Prof PS Shukla,u Registrar Omkar Singh bad u Deputy Registrar u Amit Gupta.
Kila pynpaw ba dei lyngba ka jingai jingmut jong u Director ka tnad pule puthi ka sorkar pdeng ba u Prof Shukla ula shim da ka shuti (Earned Leave) naduh ka 15 tarik u Naiwieng 2024 haduh ka 2 tarik u Lber 2025, hynrei haduh mynta ym shim la wan trei ne ban wan pyntip sha ka skulbah NEHU, Shillong hadien ba ka jingshim shuti ka jongu kala kut noh. Kane ka jingpep kaba khlem sangeh na ka kam ha ka Headquarter jongka NEHU, Shillong haduh 130 sngi.
Ka NEHUTA, NEHUNSA bad ka NEHUSU kila pynpaw ba u VC, Registrar bad u Deputy Registrar kila pynlut ia baroh ki shuti kaba ki ioh na ka NEHU ha ka samoi treikam ka jongki.
“Ha kum katei ka khep, ki kyndon bad ki Rule bapher bapher, kumjuh hapoh ka CCS(Leave) Rules, 1972, dei ban shim mardor ia ki sienjam pyrshah ia u nongtrei sorkar uba la ieh ia la ka kam khlem da ioh ia ka jingbit ban mih ne jah sah palat ia ka shuti kaba la ai, kumba la kdew ha ka Ministry of Personnel, Government of India kumta dei ban pyntreikam noh” kila pynpaw ha ka dorkhas kaba la phah sha u Acting VC.
Ka NEHUTA, NEHUNSA & NEHUSU kila pynpaw, “Ngi kwah ba phin pyntreikam ia ka CCS (Leave) Rules, 1972: (a) Proviso to FR 17(1), u ophisar uba pep na ka kam khlem kano kano ka jingbit yn ym lah ban ioh ia ka tulop bad ia ki jingmyntoi ha ka por ba u don hapdeng ka jingpep trei. (b) FR 17-A, haba uno uno u nongtrei shimet u pep trei khlem ka jingioh jingbit ne ieh ia ka kam ka jongu, ia katei ka por jong ka jingpep kan lam sha ka jingktah ne jingpynkhein ia ka jingshakri jong u nongtrei, sa tang lada dei ba la rai da ki bor kiba dei khmih ne ka jingshim shuti bad ka jinglah ban ialeh ia ki Departmental Examinations, ia kaba donkam tang khyndiat ia ka jingshakri. (c) Rule 25 jongka CCS Lcave Rules 1972, lada u nongtrei ula jah palat ia ka shuti kaba la ai da ki bor kiba dei khmih, kumta u nongtrei sorkar yn ym lah ban ioh iaka tulop halor ka jingpep ka jongu kaba khlem ioh jingbit bad ia katei ka por dei ban khate noh namar ka jingpep trei kumba ka dei ka Half Pay Leave, ka jingpep trei lada ka long shaba palat dei ban niew noh kum ka Extraodinary Leave. Ka jingpep hi nalade hadien ba kala kut noh ka sngi jong ka jingai shuti, kumta kan pynlong ia u nongtrei sorkar ban shah pynshitom”.
“Ngi kyntu ruh ia baroh ki dkhot jong ka NEHUTA & NEHUNSA ba kin shim ia ka Earned Leave kaba katto katne sngi bad ban leit shano shano bad ban wan trei da kaba pyndonkam da ki kor ki bor da kaba shu aidaw khlem da donkam ban wan sha ka jaka trei bad ban kmen pat ha kaban ioh pdiang beit ai ka tulop” kila pynpaw ha ka dorkhas haba bynrap. “Lada phi lah ban pynjynsur ia ki kyndon ain jong ka Sorkar India na ka bynta u Vice Chancellor, Registrar bad Deputy Registrar, ia katei kajuh dei ban ai lang sha ki nonghikai bad ki nongtrei bad phim lah ban pynkhein ia ka hok ka jong ngi khamtam eh ia ka Right to Equality kaba la kdew shai hapoh jongka Article 14, 15 bad 16 jong ka riti synshar ka ri”.
