Shillong, Iaiong 22: Ki kynhun sengbhalang kila kyntu iaki bor district ka West Garo Hills ban pyrkhing ia ka por ban shah rung ia ki kali heh sha sor Tura hadien ba 2 ngut ki shipara kila shah syllad haka Trok ha Tura Ballongre.
Ki sengbhalang ba kynthup ia ka GSU, FKJGP, AYWO, ADE bad FAF kila phah da ka dorkhas sha u Deputy Commissioner ka West Garo Hills ba kyntu ban leh eiei mardor halor kane ka kam.
“Ngi kwah ban ai jingmut, ba dei ban pyrkhing ia ka por ba iaid ki Trok ba rung ne ba mih na Tura sha kiwei ki jaka bad dei ban pyntreikam biang iaka hukum bala pynmih da u DC barim u Pravin Bakshi, uba la pynbeit iaka por ban nym shah rung ia ki Trok sha sor Town bad sha kiwei pat ki jaka ba marjan naduh ka por 7am-7pm” la ong ka Dorkhas.
Ki sengbhalang kila dawa ruh ban siew bai dawai da ki bor Sorkar bad ban ai ruh ka bai lut ksan sha ki bahaiing jong ki lanot.
Kila pynpaw ruh baka sor Tura kala nang heh bad kiew bha haka roi ka par namar kata ki bor district kidei ban pyrkhing iaka rukom iaid ki trok ha sor Tura bad haka juh ka por ban buh ia ki jaka ieng Trok kiba wan na Baghmara/Dalu/Chokpot kidei ban ieng ha Darengre, ki trok ba wan na Paikan/Krishnai/NGH/EGH kidei ban ieng ha Rongram bad ki trok ba wan na Mankachar/Phulbari/SWGH/ kidei ban ieng ha Damalgre.
Ka Dorkhas ka kdew ruh ba nalor ka jingpyrkhing ban iaid Trok, ki bor district kidei ruh ban peit pyrman iaka jingiaid sted ban iada iaki nongiaid nongieng bad ban lait naka jingjia aksident.
