Dawa ki Seng Nonghikai ia ka Sorkar ban iada ia ka bha ka miat ki Nonghikai Dificit na ka policy thymmai

Shillong, Naiwieng 12: Ka Khasi Jaintia Deficit School Teachers’ Association (KJDSTA) bad ka Garo Hills Deficit School Teachers and Employees Association (GHDSTEA) ha ka sngi Balang, kila kyntu iaka Sorkar Jylla ba kan iada ia ka jingmyntoi jong ki nonghikai skul deficit haba pyntreikam ia ka rukom siew tulop kaba thymmai (New Pay Structurene) lane ka categorization policy.

Haba aiti ïa ka dorkhas sha u Myntri ka Pule Puthi Bah Lahkmen Rymbui ka KJDSTA bad GHDSTEA ki la ong ba ki nonghikai ki pynpaw ka jingsngewkhia halor ka jingthmu ka Sorkar ban pyndon noh tang 2 tylli ki jait skul (two‑category) ba la pynbna ha u bnai Risaw 2025.

“Sngewbha ban pynthikna ba ka jingthmu ban pyntreikam tang 2 jait ki nonghikai bad skul kan ym ktah ha kano kano ka rukom ïa ki nonghikai deficit. Ngi kyrpad ïa ka Sorkar ban pyrkhat lang iaka kam bala mang jong ki nonghikai Deficit haba pyntreikam ïa ka rukom siew tulop thymmai (New Pay Structur) da kaba pynthikna ba ki jingmyntoi jong ki nonghikai Deficit kin long ki bym shah ktah” ki la ong.

Haba pynpaw ia ki katto katne ki mat ki bym pat lah ban pynbeit kiba ktah ia ki nonghikai deficit, haka dorkhas ki Association kila ong ba katba ki nongtrei Sorkar ki ioh 49% ka DA bad dang shen la pynkiew sha ka 51%, ki nonghikai deficit haduh mynta ki dang ioh 43% ka DA daka ba kdew ruh ba haduh mynta kim pat ioh ka Arrears.

Ki Association kila pynpaw ba kane kam iahap bad ka pynduh mynsiem iaki nonghikai deficit.

“Namarkata ngi kyntu ïa ka Sorkar ban pynthikna ïa ka jingïahap ryntih ka rukom siew DA (kumba la ju leh) bad ki nongtrei Sorkar ha ka por kaba kloi tam, ban kyntiew ïa ka jingsngewthuh ïa ka jinglong hok bad ban khanglad ïa ka jingsngewthuh ïa ka jingbymlah jong ka rukom treikam jong ka Sorkar” kila ong.

Ki Association kila pynpaw ruh ba ki nonghikai kiba la rung ha ka kam shwa ka 1 tarik Iaiong 2010 kim pat ioh iaka Centralized Provident Fund (CPF) bad kila kyrpad iaka Sorkar ban leh eiei mardor ban pynsted ban pyllait ia kane ka skhim.

Ha kaba ïadei bad ka jingioh tulop online lyngba ka MEGH‐SIMS Portal, ki Association ki la ong ba ka don ka jingduna treikam haki kor kaba dei ka daw ba slem ioh tulop namar kata kila dawa naka Sorkar ban pynsangeh pynrung kyrteng shwa shipor tad haduh ban da pynbeit ia ka rukom treikam.

Ka dorkhas ka kdew ia ki jingthoh haki jingialang naduh ka 5 tarik Lber 2025, kynthup ka dorkhas ba phah sha u Director jong ka Ophis treikam Director of School Education (DSEL) bad u Chief Secretary haba la kular ban shimkhia hynrei haduh mynta ka Sorkar kam pat shim ki sienjam.

Ka KJDSTA bad GHDSTEA ki kyntu ïa u Myntri ka tnat Pule Puthi ban shimkhia ïa kine ki mat kum ki mat ba kongsan tam, da kaba pynksan ïa ka jingktah ïaki ki nonghikai, ka jingeh ha ka liang ka pisa tyngka bad ïa ka jinglong jingman jong ka pule puthi ha Meghalaya.