Shillong, K’lyngkot 12 : Ka North-Eastern Hill University Students’ Union (NEHUSU) bad ka Khasi Students’ Union (KSU) kila dawa ba dei ban wengkam noh mardor ia u Vice Chancellor Prof Prabha Shankar Shukla namar ka jingjah trei la palat 400 sngi, kaba la pynpulom lut ia baroh ki kam Ophis.
Kine ki seng kila kyntu ia u Lat ka Jylla CH Viajayanshar ba un tuklar lem halor ki kynrum kynram kkiba mih ha ka jingpyniaid kam bad jingpyniaid ia ka pisa tyngka ha NEHU.
Ha ka dorkhas bala aiti ha ka sngi Nyngkong, kine ki seng kila kyntu ia u Lat ka Jylla ban weng noh ia u Vice Chancellor, haba kdew ba ka jingpep trei jong u bala kot 422 snem, kala lam sha ka jingsahkut bad pulom lut ki kam ki jam jong ka Ophis bad ka jingskhem jong kane ka jaka pule.
“Ngi kyrpad da kaba burom ba ia u Prf Prabha Shankar Shukla dei ban weng noh na ka Ophis Vice Chancellor ka North Eastern Hill University” ong ka dorkhas.
Kine ki Seng kila kyrpad ruh ban thung ia u Acting Vice-Chancellor kat kum ka NEHU Statutes, hadien ka jingiehnohkam jong u Pro Vice-Chancellor ha ka 15 tarik Nohprah, 2025.
Nalor kane, kila pan ruh ia ka jingpynshai halor ka jinglong jingman jong ka kaiphod ka Inquiry Committee bala thung da ka Ministry of Education ha u bnai Naiwieng,2024 bad kyrpad ban leh eiei ha kaban tem ia ka jingduna pisa kaba la ktah ia ka University, kynthup ka jingpynduna ia ka jingai mang tyngka bad kiwei kiwei.
“Kumba la pyntip da u Chairman ka Inquiry Committee ha ka 28 tarik Naiwieng 2024, la aipor 15 sngi ia ka committee ba kan pyndep ia ka kaiphod. Hynrei, haduh mynta, iaka kaiphod ka Inquiry Committee ym pat shym la aiti lane pynlong paidbah, lane don kano kano ka jingpynshai na ki bor khmih halor ka jinglong jingman jong ka. Ka jingpynslem ban pynmih ia ka jingshem ka Committee kala wanrah ia ka jingartatien, jingbym shaniah bad ka jingbym skhem ki bor pyniaid kam hapoh ka University. Ngi kyrpad da kaba burom ba dei ban pynshai noh mardor ia ka jinglong jingman ka kaiphod ka Inquiry Committee bad ba dei shim ia ki sienjam ba dei ban shim khlem da pynslem shuh, na ka bynta ka jing treikam kaba shai, kaba don jingkitkhlieh bad kaba lah ban shaniah”.
 bad ka Khasi Students’ Union (KSU) kila dawa ba dei ban wengkam noh mardor ia u Vice Chancellor Prof Prabha Shankar Shukla namar ka jingjah trei la palat 400 sngi, kaba la pynpulom lut ia baroh ki kam Ophis.){kind=link}