Shillong, Naitung 24: Ka kynhun ki Nurse hynne ka sngi Balang, kila dawa ia ka Myntri ka tnat ka koit ka khiah Kong Ampareen Lyngdoh ban pynduh noh ia ka jingthungkam contract iaki Nurse hapoh ka Jylla hynrei ban thungkam pura beit noh ia ki nangne shakhmat.
Kane ka kynhun kala aiti da ka dorkhas sha ka Myntri ba dawa ruh ban khein iap nih ia ka jingpynbna khot thep kam contract bala pynmih da ka Tnad.
“Ngi dawa ban dei ban pyndam ia ka jingthep kam contract hynrei ban pynlong beit beit daka jingthepkam ba pura (permanent) iaki Nurse khnang ban pynthikna ba ka kam ba ki trei kan long ka ba skhem naka bynta baroh kiba ioh iaka kam” ong ka dorkhas.
“Ngi dawa ba dei ban thepkam katkum ka jinglah (merit) ki nongthepkam bad ban pynthikna ba tang kiba dei hok ban ioh, kidei ban shah thungkam” kala bynrap.
Ki Nurse kila dawa ba dei ban pynthikna ruh baka rukom pynlong eksamin ka dei ban long ka ba khuid ba suba daka ba pynbiang ki bor pahara haka por thoh eksamin.
“Dei ban pynbna paidbah iaki kyrteng jong kiba ioh bad bym ioh iaka kam ha ryngkat ki marks ba ki samla thepkam ki ioh haka eksamin ban pynthikna baka rukom thepkam kan long kaba khuid ba suba”.
Haka dorkhas ki Nurse kila kyntu iaka Myntri ka tnat ka koit ka khiah ban pynsted ban pynbna iaka result.
Nalor kane ki Nurse kila dawa naka Myntri ka tnat ka koit ka khiah ban pynjlan iaka rta bad haka juh ka por ban pynphai biang iaka pisa jong kito kiba thepkam haka por khot thepkam Contract.
