Nongstoin, Nailur 05 : Ki Nongrep ka thain Markasa-Nongkasen, kila iamih paidbah ban dawa ia ka Sorkar Jylla ba kan tuklar lem halor ka jingshah ot kilo u jhur biskot ba ki pynmih ban khaii.
Kane ka sur jong ki Nongrep kala mih naka jingialang jong ki Nongrep ka thain Nongkasen, Markasa, Laitkseh, Pariong kaba long ha Nongkasen. Ia kane ka jingialang la pynbeit da ka Hills Farmers Union Mawthadraishan Block hapoh ka jingialam jong u General Secretary ka HFU-West Khasi Hills Lumlang Kharsyiemlieh.
Kane ka jingialang da kaei ka sur kala ieng tylli ban pynsngew sha ka Sorkar bad ki bor ba dei khmih ba ki nongrep kila duhnong palar namar ka jinghiar dor jong u biskot bad ka jingshah ot kilo ha ki nongkhaii.
U Bah Lumlang Kharsyiemlieh uba ong ba ki paid Nongrep ka thain kila shah ktah jur bha namar ka jingshah ot kilo u biskot nalor ka jinghiar dor jong une u jhur. Ula ong ba ka seng ka kwah ia ka Sorkar ba kan tuklar noh mardor khnang ba ki nongrep kin lait na ka jingshah iuhroit.
Ula pyntip ba ka seng kala dawa iaka Sorkar ban shna iaka ain naduh 2018 ban iada ia ki nongrep bad ka ngeit skhem ba kane ka ain kan sa urlong noh.
