Shillong, Jymmang 14: Ka All Jaiñtia Muster Roll Workers & Labour Union (AJMRWLU) ha ka sngi Bbalang, ka la dawa na ka sorkar jylla ba kan pyrkhat biang ïa ka tarik treikam jong ka minimum wages ba thymmai, ban pynthikna ba kan treikam naduh ka 1 tarik u Risaw 2023.
Ha ka shithi sha u Ryntri rangbah ka jylla u Conrad K Sangma, ka President jong ka union kong Meri Shangpung ka la ong, “Ngi kyntu da ka jingsngewrit ia u Myntri Rangbah ban pyrkhat biang ia ka tarik treikam jong ka minimum wages ba thymmai, ban pynthikna ba kan treikam naduh ka 1 tarik u Risaw, 2023, da kaba bud ryntih ia ki kyndon jong ka Act bad ka jingleh hok sha baroh ki nongtrei.”
Haba sot ia ka ain Minimum Wages Act, 1948, ka la ong ba la bthah ba ka sorkar jylla kan pynkylla ia ka jingsiew kaba rit man ka por ym palat ia ka san snem. Ia ka jingpynkylla kaba khatduh ia ka bai bylla kaba rit ha ka jylla Meghalaya la pynmih jingpynbna ha ka 1 tarik u Risaw, 2018.
“Kat kum kane, ka jingpynkylla kaba hadien ka la dei ban long ha lane shuwa ka 1 tarik u Risaw, 2023. Hynrei la ïoh jingtip ba ka jingpynbna kaba dang shen ka la buh ïa ka tarik ban treikam kane ka jingsiew thymmai naduh ka 1 tarik u Kyllalyngkot 2025, kaba la pynslem ïa ka jingpyntreikam palat ia ka shisnem,” ong ka kong Shangpung.
“Kane ka jingpynslem ka la wanrah ïa ka jingsngewkhia bad jingeh kaba khraw hapdeng ki nongtrei Muster Rol/Casual bad ki nongbylla sngi jong ka thaiñ Jaiñtia Hills bad ha kylleng ka jylla, khamtam haba kheiñ ïa ka jingkiew dor ki mar ki mata.
