Shillong Nailur 23: Ki 4 ngut ki MP ki jylla ka thain Shatei Lam Mihngi, kila phah da ka jingthoh sha u Myntri ka Sorkar Pdeng uba khmih ia ka Ministry of Road & Transport u Nitin Gadkari, ban maramot bad ban shna pynheh noh iaka surok bah National Highway-6 kaba pyniasoh iaka Meghalaya, Assam, Mizoram bad Tripura.
Kine ki MP ki dei u MP ka Shillong Bah Vincent H Pala, u MP ka Assam Dr R Roy, u MP ka Assam H.Bey bad u MP ka Mizoram u C Lalrosanga.
Kat kum ka shithi kaba la phah da kine ki MP, kila pynapw ba ka surokbah NH-6 kala sniew shaba palat pud bha bad kala pynthud iaka leit ka wan jong ki paidbah ka thain bad kala buh ruh ha ka jingma bad ka jingbym shngain ha ka leit ka wan.
“Ka jingsniew shaba palat pud jong katei ka surokbah kala buh haka jingsngewkhia kaba khraw ia ki paidhha kiba shong basah ha katei ka thain bad ia ki nongleit nongwan kiba iaid na kane ka thain.Watla ka long ka surok kaba kongsan bha kaba pyniasoh ia kitei ki jylla, ym shim la iohi ban don kano kano ka jingmaramot ne ban shna pynbha ia kane ka surok ha u snem uba la leit, kaba la lam sha ka jingeh kaba khraw kaba kynthup iaka jingbam por bun bha jong ka leit ka wan, ka aksiden bad ka jingshah pynthud ha ka kit ka bah ia ki marbam mardih” la pynpaw ha ka shithi.
Ki MP kila pynpaw ruh ba kala don ka jingjur bha jong ka jingdheng kali namar ba kala don ruh ka jingtih ia ki mar poh khyndew ha ka jylla Meghalaya bad ka jingjur jong ka jingshniah iwei ia iwei ha ka ioh ka kot hapdeng ki jylla kiba pyniasoh lyngba katei ka surokbah NH-6.
Kila pynpaw ba ka surok Two Lane kaba don mynta kam long shuh kaba biang bad kala lam sha ka jingdheng kali kaba jur, ka jingslem bad kala ktah jur ruh iaka ioh ka kot jong ka thain.
Kila kyntu iaka sorkar pdeng ba kan shimkhia noh mardor ia ka jinglong jingman jong ka NH-6, da kaba maramot noh mardor khnang ba kan long kaba shngain ia ki nongleit nongwan. Da kaba tap ia ki thliew ban maramot ia ki bynta kiba la sniew bha.
Kila kyntu ruh ban shna noh da ka surok Six Lane namar ba kala jur palat ka jingdheng kali bad khamtam ki kali kiba iaid ruh kila bun bha khnang ba kan ym don shuh ka jingdheng kali.
Nalor kane kila ong, shisien ba la dep ban maramot bad dep ban shna pynheh iaka surok, ka sorkar ka dei ban ai iaka jingkular ban maramot man la ka por ia katei ka surok bad ban khmih bniah khnang ba ka surok kan neh slem bad kan ai jingshngain namar ba ka long ka surok kaba kongsan bha.
Ki MP kila kyrpad ia u Myntri ka Sorkar Pdeng ban shimkhia mardor halor katei ka kam bad ki khmih lynti ba yn shim mardor ia ki sienjam halor kane ka bynta.
