Shillong, Naitung 18: Ka Meghalaya Pradesh Mahila Congress (MPMC) kala pynpaw ia ka jingsngewkhia halor ka jingnang bun ki jingjia shah dait ki briew ha ki ksew surok ha kylleng ki shnong ki thaw jong ka nongbah Shillong.
Kat kum ka jingong jong ka President ka MPMC Kong Joplyn Scott Shylla, kala iathuh ba la ioh ia ki jingpyntip na ki nongshong shnong khamtam ki longkmie, ki khynnah bad kiba la tymmen ba kila shah beh bad shah dait ha ki ksew surok bad kane kala nang kiew katba nang mih ki sngi, kaba la pynsyier bad buh ia ki paidbah ha ka jingbym shngain.
Ka MPMC ka ngeit skhem ba ka jingai jingshngain ia ki paidbah kadei ban long hakhmat eh bad kala kyntu ia ka Shillong Municipal Board (SMB) bad ia ki bor kiba dei khmih, ba kin shimkhia mardor ban leh eiei halor kane ka kam.
Ka MPMC kala kyntu ia ka SMB ba kadei ban kem ia kitei ki ksew surok bad ban buh ne pynsah ia ki ha ka jaka kaba kyrpang.
“Ka long kaba ima ba wat hapdeng ka jingpyntip ia kiba bun ki jingjia, ki bor ka Municipal kila sngap jar jar bad kim shym la leh eiei. Ka Meghalaya Pradesh Mahila Congress ka ngeit skhem ba ka jingshngain ia ki paidbah kadei ban don hakhmat eh bad dei ban leh eiei noh mardor hi ban pynthikna ba kin ym don ha ka jingma” ong ka Kong Joplyn Shylla.
“Ngi kyntu jur ia ka Shillong Municipal Board (SMB) bad ia ki tnad kiba dei khmih ban shim noh mardor ia ki sienjam ban kem bad ban set ia ki ksew surok ha ki jaka kiba kyrpang. Ka nongbah kam lah ban ap ia ki jingjia kiba sngewsih hashwa ba ki bor kiba dei khmih kin leh eiei da ka jingkitkhlieh” kala ong.
Kane ka jingkyrpad kala mih hadien ba ka iingkashari kala bthah ia ka sorkar bad ia ki bor khmih ka Municipal ban shimkhia ia katei ka mat, kynthup ban tei ia ka jaka sah ia ki ksew surok bad ban ai injekshon ba kin ym kha roi bad ka injekshon ban ym pynsaphriang ia ka jingpang.
Hynrei ka MPMC kala pynpaw iaka jingbynniaw halor ka jingsuki palat ban pyntreikam ia ka hukum da ki bor kiba dei khmih, kaba la pynlong pat ia ki paidbah ban mad ia ka jingeh.
Ka Meghalaya Pradesh Mahila Congress kala kyntu ruh ia ka sorkar bad ia ka SMB ba kan leh eiei noh mardor khlem da pynslem shuh.
“Ka jingshngain bad ka bit ka biang jong ki paidbah ka Nongbah Shillong ym dei satia ban iapein ” ong ka Kong Joplyn Shylla.
 kala pynpaw ia ka jingsngewkhia halor ka jingnang bun ki jingjia shah dait ki briew ha ki ksew surok ha kylleng ki shnong ki thaw jong ka nongbah Shillong.){kind=link}