Nongstoiñ, Rymphang 7: Ki lai seng ba kynthup ïa ka WKSU, ka MYF bad UHM, ki la dawa na u Deputy Commissioner ka West Khasi Hills, ban pyntreikam noh da ki kor ki bor ban thang ïa ki ñiut ki nier bad ki tiar bym lah shuh ban pyndonkam da ki briew, kiba la kynrei ha ki shnong jong ka Nongstoiñ town area.
Ki lai seng ki la buh ka jingkyrpad ha khmat u DC ban wanrah da ki kynja machine thang ñiut (Incinerator) hapoh ka nongbah Nongstoiñ, khnang ba yn lah ban pynkylla dpei ïa ki tiar kiba ki briew kim lah shuh ban pyndonkam. Kawei pat kaba donkam ka long ba kane ka kor, kan ïarap ba ki shnong ki thaw kin lait naka jingbret pathar ïa ki ñiut ki ñier bad ki jakhlia jakhlait bad ruh ban lait na ka jingpynjaboh ïa ka mariang da ki nongshong shnong
Ha ka jingïakren, u DC Nongstoiñ Bah Garod L.S.N Dykes (IAS) u la kular ban shimkhia ïa katei ka mat bad un sa thoh sha ka sorkar ba kan leh ia kaba donkam.
Kumba long mynta ki shnong kiba hap hapoh town area, ïa ki ñiut ki ñier kiba la pynlang da ki nongshong shnong la leit bret ha Mawsmai, ka jaka jong ka shnong Nongpyndeng. Hynrei, kane ka jaka ba la bret kam slem shuh ban dap smam da ki jakhlia jakhlait bad ki jaboh jabaiñ bad kan wanrah ïa ka jingsma iwtung kaba shyrkhei kumba long ha marten ha shillong.
Kumta lada la ïoh lad ban buh noh da ka kor ban thang ïa ki jakhlia jakhlait (Incinerator) kan lait shibun ïa ka jingpyn jakhlia ïa ka mei mariang, ong ka kyrwoh na ki nongïalam lai seng.
