Williamnagar, Iaiong 15 : Ki paid nongkyrshan ba kwah ban ioh ia ka Garoland State, kila dawa ia ka Sorkar Jylla bad ki MLA ba kin wanrah bad mynjur noh da ka Resolution ha Iingdorbar Thaw Ain ka Jylla na ka bynta ban phiah noh ia ka Jylla Meghalaya.
Kane ka jingdawa kala mih rally ba heh bha jong ka Garoland State Movement Committee (GSMC) kaba long hynne ka sngi Saitjain ha Williamnagar, Headquarter ka East Garo Hills District. Ia kane ka rally la ialam da u Nikman Ch Marak, nongialam ba hakhlieh duh ka GSMC.
Kane ka rally kala dawa ia ki MLA ka Jylla ba kin iamynjur lang noh da ka Resolution ha Iingdorbar ban phiah ia ka Jylla sha ka Khasi Jaintia State bad ka Garoland State.
U Nikman ula ong ba ka jingkyrshan ia ka jingdawa Garoland na kylleng ki jaka ka Ri-lum Garo bad ka jingwan iashimbynta jong ki Nokma, Nongialam Shnong, ki Laskar bad ki Sengbhalang ka dei ka dak ia ka jingkyrshan ban phiah noh ia ka Jylla.
Kane ka rally ka kynthup ia ka jingiaid paidbah ha kylleng ki jaka ka sor Williamnagar ha kaba ki nongiashimbynta kila iapyrta slogan ban mynjur noh ia ka Garoland.
