Shillong, Nailar 26: Ki nongniah kali tourist hapoh ka lama jongka All Khasi Meghalaya Tourist Taxi Association (AKMTA) hynne ka sngi Baar, kala pynlong ia ka jingiakhih da kaba shong kyllain mungor ne sit-in-demonstration ban pynbor ia ka sorkar ban thaw ia ka polisi treikam da kaba phaikhmat kyrpang sha ki nongniah kali ka jylla ha ki jaka jngohkai.
Haba iakren bad ki nongthoh khubor u President jong ka Association u Bah Recaldinus Dohling, ula pynpaw ia ka jingbitar halor ka jingbym leh eiei ka sorkar wat haba kala pynlong bunsien ia ki jingialang bad ka jingai jingkular.
Ula ong ba ka Association ha kine ki 2 snem kiba la dep, kala iai dawa na ka sorkar ban thaw ia ka polisi treikam ban pyrkhing ia ki kali kamai kiba nabar ka jylla ban leit kamai sha ki jaka jngohkai kiba don ha ka jylla.
U Bah Dohling ula ong ba ka Association kala dep wan iashimbynta ha ki jingialang bad ki myntri sorkar bad ki heh ophisar, hynrei kitei ki jingialang kim shym la seisoh eiei kaba la lam pynban ia ki ban pynlong ia ka jingiakhih.
“Ngi lah dep ban iakynduh ia u Myntri Rangbah ha ka 25 tarik u Jylliew. Ngi lah dap da ka jingkyrmen namar ba ula pynthikna ba ka sorkar shen kan sa khot ia ki nongniah kali tourist hynrei mynta lah 2 bnai kala iaid kam shim la don kano kano ka dak ka shin ba ka sorkar kan khot iakren ia ngi”.
U President ka Association ula kynthoh jur ruh ia ka sorkar ba kala kloi bha ban shna ia ka polisi na ka bynta ki kali jongki riewshimet hynrei kala kyntait pat na ka bynta ka bha ka miat jong ki nongniah kali kamai ha ka jylla, kiba ha ka jingshisha kiba siew ia ka khajna kaba heh.
“Ngi kyntu ia ka sorkar ba kan sngap ia ki jingai jingmut ki jong ngi bad ban shim ia ki sienjam ban shimkhia ia ki jingsngewkhia ki jong ngi” ong u Bah Dohling bad ka byrngem ba lada ka sorkar ka pulom ban shimkhia, kumta kim banse ban thaw hi noh ia la ki jong ki kyndon bad ki polisi treikam.
“Ka sorkar kam dei ban shah liang. Lada ka kloi ban thaw ia ka polisi na ka bynta ki kali jong ki riewshimet kumta kadei ruh ban pynkhreh ban thaw ia ka polisi kaban shimkhia ia ka jingeh ka jong ngi” ula bynrap.
Ka Association kala buh jingkylli ruh ha kaba iadei bad ka jingpyntreikam ia ka PRIME scheme, kaba ai kali ia ki nongniah kali ka jylla, da kaba ai nuksa ia ka jingjia ba tang katto katne por la knieh ne kurup noh ia kitei ki kali.
“Palat 53 ngut ki nongniah kali kiba la ioh ia ki kali hapoh jong ka PRIME scheme. Hynrei kila pyntip ia nga ba ki kali ki jongki kila shah knieh noh hapoh jong ka 2-3 bnai. Nga kwah ban kylli la kadei kane, kaba ka sorkar ka khot ba kadei ka jingiarap, kaba la ai sha ki nongniah kali ka jylla. Ha ka jingialang ka jong ngi bad u Myntri Rangbah, nga lah pynpaw ba kum katei ka scheme kam ai jingiarap eiei ia ngi bad ka sorkar kala dei ban thaw da ka polisi ban pynthikna ba tang ki nongniah kali ka jylla yn shah ban ialam ia ki nongjngohkai sha ki jaka jngohkai kiba don ha kylleng ki jaka” la ong u Bah Dohling.
 hynne ka sngi Baar, kala pynlong ia ka jingiakhih da kaba shong kyllain mungor ne sit-in-demonstration ban pynbor ia ka sorkar ban thaw ia ka polisi treikam da kaba phaikhmat kyrpang sha ki nongniah kali ka jylla ha ki jaka jngohkai.){kind=link}