Shillong, Iaiong 24 : Ki lai tylli ki Autonomous District Council (ADC)-ka KHADC, JHADC bad GHADC hynne ka sngi Nyngkong, kila dawa ia ka Sorkar Jylla ban ai ia ka jingkhein ba biang thik pa thik (actual) halor ki bhah jong ki na ki khajna marpoh khyndew (minor & Major) bad ka khajna kali (motor vehicle tax).
Haba pyntip ia kane hadien ka jingialang jong ki lai tylli ki Council, u CEM ka KHADC Bah Titosstarwell Chyne haba iakren bad ki nongthoh khubor ula ong ba ki lai tylli ki ADC kila iakren ia ka kam ba iadei bad ka pla tyngka jong ki lai tylli ki ADC.
“Ngi kyntu ia ka Sorkar Jylla ba lada long kumno kumno ruh ban ai ia ka jingkhein ba biang thik pa thik haba iadei bad kane ka kam” ong u Bah Titos.
“Ngi ju ioh ia ka bhah na ka Sorkar Jylla kum ka minor bad major mineral bad ka motor vehicle tax. Hynrei sngewsih ba ha baroh kine ki snem, ngim ju ioh ia ka jingkhein kaba beit ba haduh katno ka bhah jong ngi ka dei ban long, ngi shu ioh katba ai ia ka bhah” ula bynrap.
Pule lang ia kane: Rai lang ki District Council ka Jylla ban pyrshah ia ka jingtreikam ka UCC ha Jylla
Haba kyntu ia ka Sorkar ban pynioh kham bun ka pisa sha ki 3 tylli ki ADC, u Bah Titos ula ong “Ngi kyntu ia ka Sorkar Jylla ban pynioh kham bun ka pisa ia ki ADC khamtam kum na plan scheme, bad kiwei kiwei ki jingiarap song pisa”.
Nalor kane, u CEM ka KHADC ula ong ba ki 3 ADC kila iakren ruh halor ka jingslem jong ka Sorkar ban pyllait ia ka song pisa 15th Finance Commission ba ai da ka Sorkar Pdeng bad kyrpad ban pyllait noh ia ka song pisa hapoh ka por ba dei.
“(Ngi) kyntu ia ka Sorkar ban pyllait ia ka pisa jong ngi hapoh ka por ba dei namar ka jingpynslem ha ka jingpyllait ia ka pisa ka lam sha ka jingslem ban pyntreikam ia ka skhim. Ka Sorkar Pdeng ka ju pynbor ia ngi ban aiti ia ki Utilization Certificate (UC) hynrei ngim lah ban ai ia ki UC jong ngi hapoh ka por namar ngi ruh ngim shym la ioh ia ka song pisa hapoh ka por bala buh” ula ong.
Kat kum ka jingong jong u, ki lai tylli ki ADC haduh mynta kim pat ioh satia ia ka song pisa ba iadei bad ka Untied Scheme jong u snem 2021-2022 bad 2022-2023.
“Namar kata, ngi kwah ban kyntu lang ia ka Sorkar Jylla ban khmih ba kum kine ki jingpynslem ha ka jingpyntreikam ia ki skhim kam dei ban jia satia” ula bynrap.
Pule lang ia kane: Rakhe ki shipai 101 Area ia ka jingdap 60 snem ha kajingshakri ia ka Ri
