Shillong, Nailar 29 : U President ka VPP bad MLA ka Nongkrem Bah Ardent M Basaiawmoit ha ka sngi Palei, ula dawa hapoh ka Iingdorbar Thaw Ain, ban leh eiei ia u Myntri ka tnad Pule Puthi Rakkam A Sangma halor ka jingkynnoh ba u don bynta ban kren shun pyrshah ia ka party.
Hashuwa wanrah ia ka mat iatai ba lyngkot halor ka rukom thungkam Nonghikai ha Dadenggre Sub-Division, u Bah Ardent ula kynnoh ba u Myntri u kwah ban iohi ia ka jingiaphlei snam hapdeng ki Garo bad ki Khasi da kaba kren shun bad jingkynnoh ba ha rukom pyrshah ia ka party.
“Nga kwah ban kyrpad ia u Myntri Rangbah ka Jylla (lyngba u Lamphang) ban shim ia kane kum ka mat kaban pynbeit ha kane ka dorbar” ula ong.
“Dei ba nga don ka jingsngew pher jaidbynriew kumba u long ma u, ngan ym jin da la jied ban pyniadei ialade bad ki paid Garo naduh u snem 1980” ula bynrap.
Haba pynpaw ba ka party kala dep ujor ejahar pyrshah ia u Myntri, u Bah Ardent ula ong “Nga kyrmen ba ka Sorkar kan ym khang ia ki bor ba dei khmih ba kin leh eiei pyrshah ia u Myntri”.
