Dawa ka UKPO ia ka roi ka par ba kyrkieh, pynrung kyrteng thep vote ha ki shnong Khasi ha Karbi Anglong

Shillong, Lber 23 : Ka United Khasi People’s Organisation (UKPO) Karbi Anglong Central Committee, kala hiar jurip sha ki shnong Khasi ha Dhansiri hynne ka sngi U Blei, kaba nang pynskhem ia ka jingangnud ban leh eiei halor ki jingeh bad ban iasaid na ka bynta ka roi ka par jong ki paid Khasi ha ka thain.

Kane ka seng ba ialam da u President Pynshngainlang, Secretary Kular Skhem Khynriam bad ki dkhot Synday Sten bad Cletus Kholan Sten, kala iakynduh markhmat ia ki nongialam Shnong bad ki nongshongshnong ban snsgewthuh iaki jingeh bad ki jingdonkam jong ki.

Ka kynhun kala iakynduh ruh ia u Rangbah Shnong bad leit rung ruh ha kiba bun ki thliew iing ki Khasi ban sngap bad shah skhor ia ki jingdonkam jong ki, kiba iadei bad ka roi ka par ha ka ioh ka kot, ka kamai kajuh, ki jingtei bad ka jingdon nongmihkhmat ha ka sain pyrthei.

Ka jingsngewkhia ba hakhmat eh bala pynsngew hakhmat ki nongialam ka UKPO ka dei ka jingduna ka jingpynrung kyrteng thep vote ia ki paid Khasi ha Karbi Anglong, watla ka jingdon bun paid jong ki.

U President ka UKPO haba pynpaw ba ka jingdon ki paid Khasi ha Karbi Anglong ka kot kumba 25,000 ngut, kiba bun kiba la ioh thep vote, kim shym la don kyrteng satia ha ka electoral rool namar ka jingbatai bakla bad ki jingpynngoh jong ki briew ba nabar, khamtam na ki jaka khappud.

U Bah Pynshngainlang ula kyntu ia ki bor Sorkar ba kin leh eiei mardor ha kaban pynbeit ia kane ka kam, ban pynthikna ba ki paid Khasi kin ioh iashimbynta pura ha ka jingjied ia ki nongmihkhmat.

Nalor kane, ki Nongshongshnong kiba ban jur ruh ia ka jingdonkam ia ki jingtei kiba paka, ka jingioh ia ki jaka pule kiba biang, ki jaka sumar kiba biang bad ka lad kamai jakpoh kaba biang. Ka UKPO kala kular ban iai bteng ha ka ban iatrei lang bad ki bor Sorkar ban lah wanrah ia kine ki kam pynroi bad ban iada ia ka hok jong ki paid Khasi.

Ka UKPO ka dei kaba la iasaid la slem bha ia ka bha ka miat ki paid Khasi ha Karbi Anglong ba West Karbi Anglong District bad kala ioh ia ka jingshaniah bad jingtreilang na ki kynhun bapher bapher ki paid Khasi ba kynthup ia ki Pnar, Nongtung bad Khyrwang.