Shillong, Naitung, 31: Ka United Hynñiewtrep Movement East Jaintia Hills District (UHM-EJHD) hynne ka Sngi Nyngkong kala dawa na ka sorkar jylla ban shimkhia lem halor ka jingsniew shaba palat pud jong ka surok National Higway- 6 naduh na Soomer, West Jaintia Hills haduh ha Malidor, East Jaintia Hills District.
“Ka surok National Highway-6, kadei u thied snam jong ka jylla Meghalaya bad ruh jong ka kiwei pat ki Jylla ha ka thaiñ Shatei Lam-Mihngi jong ka Ri India, kala sniew shaba palat u pud ha baroh shil ynter, khamtam ha ki thaiñ Mynkre bad ha ka Nongbah Khliehriat, East Jaintia Hills. Ha kitei ki bynta, ki lah don satang ki thliew kiba ba heh bad ba la kylla long kum ki pung um ha ka por ba hap slap”, ong u President, ka UHM-EJHD Bah Brosenly Siangshai ha ka kyrwoh khubor.
Ula ong ba ka long kaba lehrain ban khot kyrteng ia katei ka surok kum kata ka surok National Highway jong ka Ri India, haba ka kyrteng bad ka jinglong jingman jongka, kam iahap satia da lei lei ruh em bad ia mynta hi, kadei ka National Highway tang ha ka nam ym ha ka kam.
Une u nongialam ula ong ba kane ka jingsniew palat jong katei ka surok, kala buh ha ka jingeh ia ka leit ka wan jong ki paidbah khamtam ha kitei ki jaka ba la sniew shaba palat pud.
“Ha kiba bun ki khep, ka jingsniew palat jong ka surok ka pynlong ia ki kali rit bad kali heh ban sniew noh hapdeng surok bad kane ka wanrah ia ka jingjynjar shuh ia u paidbah nongleit nongwan, na ka jingdheng kali bad ruh na ka hap shah shitom jong ki ban iaid beit lyngba jong kitei ki pungum bad ki thliew kiba heh kiba don ha katei ka surok kiba lah ban buh ia ki bad ka kali jong ki hapdeng ka jingma kaba khraw” ong u Bah Siangshai.
“Lada ha kane ka dur , ka por kan sa poi ba ka leit ka wan lyngba jong ka surok Bah NH-6, kan dkut syndon noh tdam lada jia ba ki bor ba dei peit ia ka bha ka miat jong kane ka surok kim shym la shimkhia satia ban maramot noh kloi bad lada jia ba kane ka surok, ka dkut noh, kane kan sa wanrah ia ka jingeh kaba khraw tam ia u paidbah jong ka jylla bad ruh jong ka thaiñ Shatei Lam-mihngi jong ka Ri India” ong u nongialam ka UHM-EJHD.
Ka seng UHM-EJHD, ka dawa jur na u Myntri Rangbah ka jylla u Conrad K Sangma bad khamtam eh iaki Arngut ki nongmihkhmat jong ka East Jaintia Hills District u Bah Kyrmen Shylla, MLA ka Khliehriat Constituency uba long u Myntri Sorkar bad ka Kong Santa Mary Shylla, MLA ka Sutnga Saipung Constituency ban shimkhia bad tuklar kloi noh halor ka jingsniew palat jong kane ka surok.
Pule ruh: Mynjur ka Bangladesh ban pynieng ia u motdur ba shirynieng u Tirot Sing ha IGCC, Dhaka
 hynne ka Sngi Nyngkong kala dawa na ka sorkar jylla ban shimkhia lem halor ka jingsniew shaba palat pud jong ka surok National Higway- 6 naduh na Soomer, West Jaintia Hills haduh ha Malidor, East Jaintia Hills District.){kind=link}