Dawa ka Synjuk ki trok kamai ia ka Sorkar ban pyntreikam ia ka SOTS

Shillong, Rymphang 10: Ka Joint Action Committee (JAC) kaba kynthup ia ka East Jaintia Hills Truck Owners & Transporters Association (EJHTOTA) bad ka Jaintia Hills Truck Owners’ Associatin (JHTOA) ha ka sngi Baar kala kyrpad ia ka sorkar jylla ban sdang ia ka Special One-Time Settlement Scheme (SOTS) ban pynbeit ryntih ia ki kot ki sla kali kaban neh slem.

Ha ka dorkhas kaba la aiti ha u Symbud Myntri Rangbah uba khmih ia ka tnad Transport bah Sniawbhalang Dhar, ka JAC kala kyntu ia ka sorkar ban pdiang ia kaban map noh ne ban pynduna ia ka jingsiew slem bad ka jingshah dain kuna, ban ailad ia ki trai kali ban siew pyndep ia ka khajna bad ban long kiba lah ban siew pyndep bad kiba kohnguh.

“Ngi kyrpad ia ka ophis kaba don burom ka jong phi ban pduang bad ban sdang noh ia ka Special One-Time Settlement Scheme (SOTS) ban pynbeit ryntih noh ia ki kot ki sla kiba la sahteng la slem bha ban don ia ki kot ki sla kiba biang” kala pynpaw.

Ka committee ka ngeit skhem ba kane ka scheme kan ai jingmyntoi lang ia ka sorkar bad ia kiba donbynta ha ka kam pyniaid ia ki kali.

“Kan iarap mardor ha kaban pynmih ia ka khajna na ka bynta ban pynkhuid ia ka khajna kaba rim ba sah bad ban wanrah ia bun bah ki kali ki bym treikam ne ki bym kohnguh sha kata ka bynta ban long kiba lah biang ban siew ia ka khajna” kala pynpaw bad ka bynrap “Na ka bynta ki trai jong ki trok, kan pynkupbor ia ki dkhot ki jong ngi, ia kaba mynta kim lah ban siew ia ka khajna kaba heh, ban kylla long kiba kohnguh, ban bteng biang ban trei katkum ka ain bad ban lah ban pynbeit ryntih ia ki kot ki sla kali man la ka snem nangne shakhmat”.

Ka Joint Action Committee kala pynpaw ba ka don ia ka jingngeit kaba skhem ba ka sorkar kan khmih bniah ia kane ka mat da ka jingdon ia ka jingsngew synei bad ban pdiang da kaba phai sha ka jinglong jingman bad na ka bynta ka bha ka miat jong ka ioh ka kot ki dkhot bad ka jingiaid ki kali ha ka jylla.