Nongpoh, K’lyngkot 11 : Ka Synjuk ki Rangbah Shnong Ri-Bhoi District, kala dawa ia ka Sorkar Jylla ba kan thung noh mardor da u Block Development Officer ba pura ha Umsning C&RD Block.
Haba kren sha ki lad pathai khubor hynne ka sngi Palei, u Chairman ka Synjuk Bah BB Makdoh, ula iathuh ba kane ka Block ha Ri-Bhoi kala treikam khlem u BDO ba pura mynta la bun bnai, kaba la buh jingeh ïakiba bun ki Rangbah Shnong ban pyndep ïaki kam ki jam khamtam ha kaba ïadei bad ka pisa ka pilaiñ.
Ula ong, ba kum ka Synjuk ki pynpaw ka jingsngewkhia ba tang haki 5 bnai haduh 4 ngut la pynkylla ïaki BDO ha Umsning C&RD Block.
U la ong ruh ba haduh mynta ym don u BDO ba thikna ban shimti pura ïaka kam bad u BDO ba la thung mynta ruh u dei ba shu thung tang shipor bad um don bor ha kaba ïadei bad ki kam pisa khamtam ba kum ki Rangbah Shnong na kylleng ki shnong kila donkam ïaka pisa ha kaba ïadei bad ki skhim bapher bapher naduh ka SRWP, MP skhim bad kumjuh ruh ka skhim MNREGA ba dei ban ioh naduh shuwa ka Khristmas.
U la ong ruh ba ka jingkylliang BDO ha Umsning C&RD Block kala long shaba palat bad kala buh jingeh ïakiba bun ki Rangbah Shnong ban pyndep ïaki kam ki jam.
