Shillong, Risaw 31: Ka Synjuk ki Rangbah Shnong ka Ri Bhoi District, hynne ka sngi Baar, kala iakynduh ia u Myntri ka tnad Social Welfare u Bah Paul Lyngdoh bad dawa kyntiew kyrdan noh ia ki Aganwadi sha ki Centre kiba pura.
U General Secretary ka Synjuk ki Rangbah Shnong ka Ri Bhoi District Bah PB Sylliang ha ba iakren bad ki nongthoh khubor ula ong, ba ka Synjuk la ai da ka dorkhas ban dawa ia ka Sorkar baka dei ban kyntiew noh ia ki Aganwadi sha ki Centre kiba pura namar kila don katto katne tylli ki shnong kiba la trei kum ki “Mini Aganwadi Centre” da ki phew snem bad kila don ruh ki shnong kiba la donkam ban thaw ia ki Aganwadi Centre kiba thymmai.
“U Myntri Sorkarula bthah ia ka Synjuk ban aiti ia ka thup kyrteng jong ki shnong kiba don ia ki Aganwadi Centre kiba donkam ban kyntiew kyrdan noh sha ki Centre kiba pura bad kumjuh ruh ia ki shnong kiba donkam ban buh ia ki Aganwadi Centre kiba thymmai” la ong u Bah PB Sylliang.
Ula ong, ba ka Synjuk kan sa lum ia ka jingialang jong ka Executive Committee ban pan ia ki jingtip na ki Rangbah Shnong.
Ha kawei pat ka liang ka Synjuk kala pynpaw ha u Bah Paul Lyngdoh, uba khmih ia ka tnad Jngohkai, ba un tuklar em halor ka jingeh ba iakynduh da ki samla kiba thmu ban tei ia ki Homestay ha Ri-Bhoi lyngba ki skhim ka Sorkar.
“Kum ka Synjuk ngi la shem ba bun ki samla na Ri Bhoi kila applai “Online” lyngba ka PMEGP hynrei mynta la 6 bnai bad la shisnem ki samla kim shym la ioh ia kano kano ka jingpyntip na ka liang ka Bank kaba dei ban ai ram ia ki ban tei ia ki Homestay” ula ong.
U pyntip ba u Myntri ula ai ka jingkular ba yn sa khot ia ki Bank ba kin pynsted ia kane ka kam.
