Shillong, Jylliew 25 : Ka Synjuk ki Rangbahkur kala iakynduh ia u Chief Executive Member (CEM) ka JHADC Bah Thombor Shiwat ha ka sngi Palei bad dawa ban wanrah ia ka ain ka ban iada ia ka riti ai pateng sha ki Kynthei ba ju leh da ka Jaidbynriew trai muluk ha Jylla.
Ia ka kynhun la ialam da u President ka Synjuk Bah RL Kharpran, General Secretary Bah Raphael Warjri, nongaiktien Bah RL Blah, bad ki dkhot ba kynthup ia u Bah Mansturdy Nongrem bad Bah JL Khongshei.
Ka kynhun kala pyntip ha u CEM ba ka ain ka long kaba donkam ban iada ia ka jingai pateng sha ki Kynthei, kaba ki ong ba ka dei kaba kongsan tam ha ka jingithuh ia ka imlang sahlang bad ka riti dustur ki Khasi bad Jaintia.
Kila pynksan ba khlem ka jingkyrshan ka ain, kane ka rukom ai pateng ka la mad ia ka jingnang shah rong noh katba nang iaid ka por.
Ki nongialam ka Synjuk kila dawa ruh ia ka rukom treikam kaba iaid kat kum ka riti synshar bad ka ain ban ai jingithuh noh ia ki Dorbar Kur lane Clan Council, bad ban pynkupbor ia ki Rangbah Kur.
Kat kum ka jingong jong ki, kum kane ka jingithuh kan ailad ia ki Dorbar Kur ba kin pyniaid ia la ki kam kat kum ka riti dustur ha kaban pynneh pynsah ia ka jingai pateng, ka dustur bad ki jingleh tynrai jong ki trai muluk.
Ka kynhun kala pyntip sha u Bah Shiwat ba ki sngewskhlem ba ka ain ba kyrpang kan pynkhlain ia ki bor treikam nala tynrai bad iarap ban pynthikna ba ka jingai pateng sha ki kynthei kan dang bteng na ka bynta ki pateng ban nang wan.
U CEM ka JHADC ula sngap ia ki jingdawa ka Synjuk watla um pat shym la pynbna ia kano kano ka rai hadien ka jingialang.
 ka JHADC Bah Thombor Shiwat ha ka sngi Palei bad dawa ban wanrah ia ka ain ka ban iada ia ka riti ai pateng sha ki Kynthei ba ju leh da ka Jaidbynriew trai muluk ha Jylla.){kind=link}