Shillong, Nohraph 05 : Ka Dorbar Shnong ka Mukroh kala aiti ia ka dorkhas sha u Myntri kam pohiing ka Ri Amit Shah, ba dawa ban tohkit CBI ia ka jingshah siat iap ki 5 ngut ki nongshongshnong ha ki Pulit ka Assam, kaba la jia ha ka 22 tarik Naiwieng, 2022.
Ka dorkhas, kaba la aiti lyngba u Lat ka Jylla Ch Vijayashankar ha ka sngi Thohdieng, kala kyntu ruh ia ka Sorkar Pdeng ba kan pynbeit noh kham kloi kat kaba lah ia ka jingiakajia pud hapdeng ka Meghalaya bad Assam bad bthah ia ka Jylla Assam ba kan pynsangeh lut ia baroh ki kam ha ka thain Mukroh kumba la batai ha ka jingpynbna bala pynmih da ka JHADC ha u snem 1968.
“Ngi kyntu ia ka Sorkar India ba kan pynkloi ia ka jingtohkit CBI bad ban pynbeit noh ia ka jingiakajia pud ban lah pynkut syndon ia ki jingeh jingjynjar jong ki nongshongshnong ka Mukroh” ong ka dorkhas.
“Ngi la mad ia ki jingshah leh donbor na ki kynhun kaikhlaw ki Karbi bad ka Sorkar Assam bad KAAC namar ka jingiakajia pud ba dang iaid hapdeng ka Assam- Meghalaya” ong ka Dorbar Shnong.
Ki Nongshongshnong ka Mukroh kila mad ia shibun ki jingshah leh donbor bad shah pyndik ha ka kti jong ki Pulit Assam, ki Pulit ka Tnad Forest ka Assam, bad ki Pulit ka Tnad Forest ka Karbi Anglong Autonomous Council haba ki leit sha ki jaka rep bad leit pom ia ki dieng thang.
Ka jingkam ka Jylla Assam ba jan shiteng na ka shnong Mukroh ka hap hapoh u pud u sam jong ka dei kaba la pyrshah jur da ka Shnong Mukroh, kaba la ai ka jingbatai ba bakla kat kum ka jingpynbna ba pynmih da ka Sorkar Assam ha u snem 1951.
Ka dorkhas ka pynpaw ruh ia ka jingai jingbit beain ia ki khlaw kiba dei jong ki nongshongshnong ka Mukroh ha Salang, Mukroh bad kiwei ki jaka da ka Sorkar Assam bad KAAC, wat hapdeng ka jingpyrshah kaba jur da ka Dorbar Shnong Mukroh.
Ki nongshongshnong ka Mukroh kila mad ruh ia shibun ki kam thombor ha ki kynhun kaikhlaw ki Karbi ba kynthup ia ka
Karbi National Volunteers (KNV) bad United People’s Democratic Solidarity (UPDS) naduh u snem 2000.
Kat kum ka jingong ka Dorbar Shnong, ki jingjia kynthup ka jingpyniap dusmon ia ki hynriew ngut ki nongshongshnong kynthup I khynnah, da ki ehrang ka KNV ha ka 8 tarik Rymphang 20003, ha ka khlaw ha Umlaphiah, Mukroh. Kine ki lanot ki kyrteng u Dik Sumer, Phun Hasem, Dia Myrten, Pro Hasem, Wen Samaiang (under 18 yrs), bad Treibor Talang.
Ka Dorbar Shnong kala pyntip ruh ba ki ehrang ka KNV bad UPDS ki ju ai shithi dawa pisa sha ki Khasi Pnar ha Block-I bad II bad Mukroh, haba maham ruh ia ki ba kim dei ban leit rep ha ki jaka ba iakajia khlem da ioh jingbit. Ha u Lber 2005, kine ki kaikhlaw kila lum ia ka khajna ba kot T.10 lak na ki nongshongshnong ka Mukroh.
Kine ki jingthombor kila pynbor ia ki nongshongshnong ka Umlapiah, Mukroh ba kin phet nala ki jong ki iing bad ka skul ba la shna da ka JHADC lah hap ban khang khyrdep bad rah noh sha ki jaka pdeng jong ka shnong Mukroh.
Ka Dorbar Shnong Mukroh kala buh jingthoh ruh ia kiba bun ki jingjia thombor kynthup ka jingpyniap ia u Tdan Shadap ha u Iaiong 2003, ka jingbyrngem pyniaip da ka UPDS sha ki nongshongshnong ka Mukroh bad Saba halor ka pisa ba ki dawa ba kot T.5 lak ha u Jylliew 2003.
