Nongpoh, Naiwieng 05 : Ka seng Ri-Bhoi Youth Federation (RBYF)-Shakoikuna Unit, kala dawa ia ka Sorkar bad ka Tnad PWD ba kan maramot noh mardor ia ka surok 20 Mer Pahammawlein sha Shakoikuna, kaba jrong kumba 7 Km eiei.
Kane ka Seng kala hiar jurip ia kane ka surok hynne ka sngi Ba-ar hadien ka jingud jingnam palat jong ki paidbah ia ka jing sniew bad khohruh khohram jong kane ka surok, kaba la pynsyllang shikatdei eh ia ka leit ka wan, ka kit ka bah bad ka pang ka shitom.
U President ka RBYF-Shakoikuna samla Treilang Maring, ula ong ba kane ka surok ha ki por mynshuwa kam dei eh kaba sniew haduh katta katta lait noh tang ha ki katto katne ki bynta hynrei u kynnoh ba dei hadien ka jingtih bad maramot ne siang rong thymmai da u Contractor uba la iehshrah khlem pyndep ia ka kam la katto katne bnai, kane ka surok kala jot biang bad dap tang da ki thliew bad ki maw kiba la khoh na ka surok rim.
Ula kynnoh ba u Contractor uba shimti ban siang rong thymmai ia kane ka surok, ula shu ieh khlem pyndep ia ka kam la katto katne bnai, kaba la wanrah ia ka jingsyrtok ia ki paidbah ba leit ba wan na kane ka surok.
Kane ka Seng kala dawa ia ka Tnad PWD ban hukum ia u Contractor ba un siang rong pyndep noh ia ka surok lem kumta ka seng kan hap ban shim da kiwei pat ki lad ki lynti.
