Nongpoh, Jymmang 14 : Ka Synjuk ki Rangbah Shnong ka Raid Sohkhwai, Ri-bhoi District, kala dawa ia ki bor Sorkar ba kin khang noh ia ka jingiaid jong ki kali kit mar ba khia na ka surok Umdu-Pahammawlein 20 mer, namar ki dei ki daw bah ba pynjot bad pynsniew ia ka surok.
Ka synjuk kala ong ruh ba kine ki kali kynthup ia kiba kit shyiap, dewiong, rnga bad kiwei kiwei, kila iaid na kane ka surok Umdu-Pahammawlein tang ban iaid lait ia ka weightbridge, ban lait ka siew khajna ne shah dain kuna ia ka jingkit palat pud.
Kane ka synjuk kaba kdup ia 7 tylli ki Shnong, ha ka jingialang kaba long hynne ka sngi Balang, kala shim ia ka rai ban pyn paw ia ka jingpyrshah kaba jur ia ka jingwan iaid ki kali kit mar ba khia na kane ka surok bad rai ruh ba shen kin sa leit ban buh da ka jingujor sha ka Ophis u Deputy Commissoner ka Ri-Bhoi ba un leh eiei mardor.
Ia kane ka jingialang la pyniaid da u President ka Synjuk Bah Bristar Sylliang bad kiba iadonlang ki kynthup ia u Bah Shanbor Rani, samla Aibankitbok Sylliang, Secretary ka Seng Samla Shnong Sohkhwai bad ki reiw rangbah ka Raid Sohkhwai.
Ki nongialam ka synjuk kila pynpaw ba ki trok kit mar ba khia kila iaid sahuh na kane ka surok kaba la pyntrei lyngba ka skhim PMGSY haba ong ba kane ka dei tang ka buit ba kin iaid lait ia ka Weightbridge jong ka Sorkar.
Kila ong ba ka surok Umdu-Pahammawlein ka dei tang ka surok Shnong kaba rit bad khim bha hynrei lyngngoh pat ba ki trok kit mar ba khia, kila pyndonkam ia kane ka surok khlem ka jingpyrwa eiei ruh em.
