Shillong, Naiwieng 03: Ka Synjuk Rangbah Shnong Raid Mathan Ri-bhoi District hynne ka sngi kala leit buh daka dorkhas ha u Myntri ka tnad ka koit ka khiah Bah Wailadmiki Shylla ba kyntu ia ka Sorkar ban kyntiew kyrdan noh ia ka Umshaken Health and Wellness Centre(HWC) sha ka Public Health Centre (PHC).
Ka Synjuk haka dorkhas kala ban jur ia ka jingdonkam ban pynbiang iaki jingdonkam haka liang ka koit ka khiah ban shakri ia ki nongshong shnong ha ka thain Raid Mathan, Ri Bhoi District.
Ka la ong ba ki jingtei bad ka jingdon nongtrei nalor kiwei ki jingdonkam kiba don mynta ha Umshaken Health and Wellness Centre kim pat biang satia ban pynbiang ia ki jingdawa jong ki paidbah.
Kala pynpaw ba ia ka jingtyrwa ban kyntiew kyrdan iaka Umshaken Health and Wellness Centre la tyrwa naduh u snem 2014, hynrei haduh mynta kam shym la don kano kano ka jingbuddien ne ki sienjam ban kyntiew kyrdan.
Ka Synjuk ka la kyntu ia u Myntri Sorkar ban shimkhia mardor ban bishar bniah bad pynsted ia ka jingtyrwa ban mynjur ia ka pisa bad ban pynthikna ia ka jingdon ki nongtrei kiba biang hapoh ka jaka sumar.
“Ka jingpynbha kan ai ïa ka jingshakri ha ka por kaba biang bad kaba bha sha ki paidbah nong shong shnong kaba ïahap bad ka jingthmu jong ka Sorkar ban pynbha ïa ka jingai jingsumar ha ki thain nongkyndong” la ong ka dorkhas.
