Nongpoh, Naitung 04: Ki Khun ki hajar ka Raid Marwet hynne ka sngi Ba-ar kila iatur paidbah sha ka Ophis u Syiem ka Raid ban dawa ba ka Raid kan pynthikna ba ka jingjied ia ki Rangbah Shnong Pyllun ka dei ban long da ki Khun ki Hajar jong ka Raid.
Kane ka jingdawa kala mih hadien ba ka Hima Mylliem kala bthah ia ka Ophis u Syiem ka Raid Marwet ba kan pynlong noh ia ka jingjied ia ki Rangbah Shnong Pyllun, ki ban khmih ia ki shnong kiba hap hapoh ka Raid ia kaba la phiah ha ki saw bynta-ka Byrnihat Pyllun, Baridua Pyllun, Narbong Pyllun bad Umtyrnga Pyllun.
Ka Byrnihat Pyllun ka kynthup ia 7 tylli ki Shnong, ka Narbong Pyllun ka kynthup ia 6 tylli ki Shnong, ka Baridua pyllun ka kynthup ia 10 tylli ki Shnong bad ka Umtyrnga Pyllun ka kynthup haduh 20 tylli ki Shnong.
Lah ban kdew hangne ba ka Hima Mylliem dang shen kala weng noh ia ka jinglong Rangbah Shnong ki jaidbynriew Garo ha ki shnong khappud ka Raid Marwet. Ka Hima kala bthah ruh ia ki nongshongshnong Khasi ba kin phah iaki kyrteng ha ryngkat ki kot ki sla ban pynshisha ba ki dei ki Khasi hapoh ka 30 tarik Jylliew.
Namar kane ka jingbthah, ki nongshongshnong ka Raid bala lamkhmat da ki riew rangbah bad ki Longkmie, kila leit ban iakynduh ia u Syiem ka Raid Arun Ken Syiem ban iakren shai kdar halor kane ka kam jied Rangbah Shnong ha ki 4 tylli ki Dorbar Pyllun.
Kila buh ruh ka jingdawa ba ka Raid ba dei ban ailad ne khein kyrpang shuwa tang ia ki Nongshongshnong kiba dei n aka jaid ka Khong jong ka Marwet ba kin iashimbynta ha ka elekshon Rangbah Shnong Pyllun.
Na ka liang u Syiem ka Raid, ula pynshai ba ka rai baroh ka shong beit ha ka Ophis u Syiem ka Hima Mylliem.
Pule ruh: Iakynduh u CM ia ki Dkhot ka ISA, yn shim ka Jylla ia ki buit pynmih bording na ka Sngi
