Shillong, Naiwieng 27 : Ka Meghalaya Users’ Forum (MUF) kala kyrpad ia u Myntri Rangbah ka Jylla ban thung ia ka jing tohkit bad ban kem ia ki trai jong ki artylli ki Rahabilitation Centre ha Assam, halor ka jingiap jong ki arngut ki samla na Shillong ba leit sumar naka jingdih droks ha kine ki jaka sumar.
Kine ki Rehabilitation Centre ki dei ka Better Wellness Living Foundation kaba don ha Mangaldai, Assam, kaba long trai da u Arup Jerial Passah bad Sabir Khan lem bad ka Alive Again Foundation kaba don ha Chandrapur, Hatisila, Guwahati, kaba long trai da u Arup Jerial Passah bad u Shahid.
Kane ka jingdawa kala mih hadien ka jingiap ki arngut ki samla na Shillong ba leit sumar ban lait noh na ka jingdih droks- u samla Rickelson Jyrwa ba na Chandmari, Syiap, Golflink, Shillong bad u Meban Syndor uba na Mawlai Mawtawar, Shillong.
Ka MUF kala aiti da ka dorkhas sha u Myntri Rangbah ka Jylla Conrad K Sangma, kaba pynpaw ba ia ka met jong u Meban Syndor la aiti shaki bahaiing hasem da ki nongpyniaid ka Rehab Centre khlem ka jingtip ki Pulit ne iaid kat kum ki kyndon kum ka jingleh post mortem bad kiwei kiwei. Ka ong ba kum kine ki jingleh ka pynsngew artatien ia ka jingtreikam jong kine ki centre.
Kala kam ruh ba kala ioh pdiang ia ki khubor na ki nongdih droks ha kine ki centre ba ki ju shah leh bein, leh tohmet bha. Kapyntip ba ka MUF ha ryngkat ka jingiatreilang bad ki lad pathai khubor, ka Association of Drugs Rehabilitation CEnyre nalor ka State Anti-Drugs and Prohibition Council na Assam, kila iatrei borbah ban sei madan ia ki kam bymhok bad jing leh tohmet ia ki nongpang da u Arup Jerial Passah bad ki briew ba iadon bynta lang bad u.
Ka MUF kala pyntip ba ha ka 25 tarik Naiwieng, 2024, la ioh ban pyllait ia kumba 200 ngut ki nongdih droks na kine ki jaka sumar bad kine ki briew kila iathuh khana ia ki jingshah shoh bad shah lehbein, ia kiba la pynmih ruh ha ki lad pathai khubor.
Namar kane, ka MUF kala dawa ban pynlong ia ka jingtohkit halor ka jingiap u Rickelson Jyrwa bad u Meban Syndor bad ban kem bad pynsajia ia u Arup Jerial Passah bad ka kynhun jong ki, kiba don bynta ha ki kam leh tohmet ia ki nongpang.
Ka MUF kala dawa ruh ban pynthikna ba ym dei ban shah ia kino kino ki briew ne kynhun ba kin bat, shoh ne byrngem byrsit ia ki briew ba dih droks bad ban leh tyngeh ha kaban pynsangeh ia ki kynhun kiba bat ia ki nongdih droks, kaba pynkhein ia ka hok tynrai jong u briew.
 kala kyrpad ia u Myntri Rangbah ka Jylla ban thung ia ka jing tohkit bad ban kem ia ki trai jong ki artylli ki Rahabilitation Centre ha Assam, halor ka jingiap jong ki arngut ki samla na Shillong ba leit sumar naka jingdih droks ha kine ki jaka sumar.){kind=link}