Shillong, Naiwieng 25: Ka Meghalaya Pradesh Congress Committee (MPCC) hynne ka sngi kala dawa ba baroh 12 ngut ki Myntri sorkar kynthup u Myntri Rangbah ka jylla kidei ban hiar shuki noh namar kane ka sorkar Meghalaya Democratic Alliance (MDA) kam lah ban ai jingiada iaki paidbah nong shong shnong ka jylla.
Kane ka jingdawa kala mih na ka jingialang sngewlem bad jingiathang mombiti bala pynlong ha Congress Bhavan ban kynmaw burom ia ki 5 ngut ki riew paidbah ba shah siat iap ha ki Pulit ka Assam ha shnong Mukroh, West Jaintia Hills.
Haba kren sha ki lad pathai khubor u bah P.N Syiem u la pynrem ruh iaka sorkar Meghalaya daka ba kynnoh ba haduh mynta ka khlem nud ban pynrem iaki Pulit ka Assam ba donkti ban siat iap ia 5 ngut ki riew paidbah ka Meghalaya bad ia uwei u Pulit Forest Guard ka Assam.
“Kane ka sorkar haduh mynta kam lah ban ai jingiada iaki paidbah nong shong shnong ha ki thain khappud bad ha kylleng ka jylla bad dei namar kane baroh 12 ngut ki Myntri sorkar ki dei ban hiar shuki noh ban ailad ia kiwei ki ba lah ban ai jingiada iaki paidbah” la ong u bah P.N Syiem.
U bah P.N Syiem u la ong ruh ba ka sorkar kadei ban weng lut iaki pulit ba pahara iaki ïng jong ki Myntri sorkar bad iaki ïng jong ki ophisar bad phah ia kine ki pulit sha ki shnong ba don ha ki thain khappud ban ai iada iaki paidbah.
U la ong ruh ba ka sorkar jyla kadei ban ai kam sorkar ia iwei na ki 5 tylli ki longïng ba khlad noh na ka jingshah ther kuli ha ki pulit Assam.
Nalor kane u bah P.N Syiem u la dawa ruh naka sorkar ba kan pynbeit noh iaka jingiakren pynbeit pud bad ka Assam bad dawa ruh ba ka rukom iakren pynbeit pud ha kane ka kynti kam dei shuh katkum ka jingai jingmut ki Regional Committee hynrei kan dei beit daka jingmon ki paidbah ha ki shnong khappud.
