Shillong, K’lyngkot 10 : Ka Meghalaya Commercial Truck Owners and Drivers Association (MCTODA) kala dawa ia ka Sorkar Jylla ba kan shna kham bun ki surok layby ha ki National Highway ban weng ia ki jingeh ba mad da ki nongniah trok.
Haba kren hadien ka General Meeting ba nyngkong jong ka seng mynta u snem, u President ka MCTODA Moslander Marngar ula ong “Ki trok kim lah ban iaid ha ka por mynsngi, khamtam ha Ri-Bhoi, namar ka jingpynjari ia bun ki no-entry. Ki trok kiba pyrshang ban poi sha Assam ki hap ban shu pynieng harud surok ha Byrnihat, Ri-Bhoi, namar ka Assam bad Meghalaya kim shah ban pynieng ha ka por ba khang iaid trok”.
Ka seng kala rai ban iakynduh ia ki Heh Sorkar bad ia u MP ka Shillong ba kin pynbeit ia kane ka jingeh bad ban tynruh ha ka ban shna kham bun ki surok layby ba kin biang ki jaka pynieng ia ki trok.
Ka MCTODA kala pynpaw ruh ia ka jingsngewkhia halor ka rukom pynbeit ba mynta ban pynkyntiew ia ki marbam da ka Food Corporation of India (FCI), haba kynnoh ba ki dalal (middlemen) ki don bynta, kaba wanrah ia ka jingduhnong ia ki trai trok bad ki nongniah.
Ka seng ka don jinthmu ban iakynduh ia ki bor pyniaid ka FCI bad ban phah tuklar lem ha ka Sorkar.
“Halor kane, ngi la rai ban iakynduh ia ki borkhmih ka FCI bad ngin phah tuklar ruh ha ka Sorkar namar ngi lah dep thoh sha ka FCI hynrei haduh mynta ym pat shym la leh eiei halor kane ka bynta” ula ong.
Haba iadei bad ka dor kit mar jong ki karkhana dewbilat, u Bah Moslander ula ai khublei ia ka Iingkashari Meghalaya High Court kaba la bthah ban buh ha ka dor ba T.8, watla ki karkhana dewbilat ki kwah ban buh ha ka dor ba T.7 bad ka seng ka dawa T.9. Ki karkhana dewbilat kila khot ia ka jingialang bad ka Seng ban iakren halor kane ka kam.
“Ki karkhana dewbilat kila pynbeit ia ka jingialang bad ka seng ha kine ki khyndiat sngi ban wan, ka ban long ruh ka jingia lang kaba lai da ka jingthmu ban pynbeit noh ia kane ka kam” ula ong.
 kala dawa ia ka Sorkar Jylla ba kan shna kham bun ki surok layby ha ki National Highway ban weng ia ki jingeh ba mad da ki nongniah trok.){kind=link}