Shillong, Jymmang 7: Ka kynhun ki Nongialam Shnong ka Mawsynram hapoh ka jingialam u MDC Bah Alvin Sawkmie mynta ka sngi Balang, kila ia kynduh ia u Myntri Rangbah ka jylla Conrad K Sangma bad kyrpad ban tuklar lem halor ka jingdawa ban kyntiew kyrdan ia ka Mawsynram Community & Rural Development Block sha ka Civil Sub-Division bad kumjuh ruh ban shna ia ka surok na Weiloi sha Balat.
Haba kren sha ki lad pathai khubor hadien ba la dep iakynduh ia u Myntri Rangbah, u Bah Sawkmie u la ong ba kine ki ar tylli ki mat ki dei kiba la sahteng la bun bun snem.
“Nga dap da ka jingkmen ban pyntip ba u Myntri Rangbah u la ai ha ngi ia ka khubor ba sngewtynnad bad kyrmen skhem ba hapoh ka jingialam jong u, ka Mawsynram kan sa ioh ia kane ka surok ba thymmai na Weiloi sha Balat bad kumjuh ruh ban kyntiew kyrdan noh ia ka Mawsynram block sha ka Civil Sub-Division ” ong u Bah Sawkmie.
U Bah Sawkmie u la pynpaw ba ki paidbah ka thain kin sa ioh ka jingmyntoi ba khraw lada ka sorkar kan shim khia ban kyntiew kyrdan ia ka Block sha ka Civil Sub-Division namar kumba long mynta ki paidbah na ka thain bad ki bynta jong ka Mawsynram, ki hap ban wan shaduh sha Shillong ban pyndep ia ki kam kiba rit ba ria ruh bad kane ka ktah ym tang ia ka por hynrei wat ia ka pisa pilain ruh kumjuh bad wat ia ka bor ka sor ruh kumjuh.
U Bah Sawkmie u la pyntip ruh ba ka kynhun kala ioh jingtip ba la dep ban pynkhreh ia ka detailed project report (DPR) na ka bynta ban shna noh ia ka surok na Weiloi sha Balat la dep ban pynkhreh da ka sorkar bad la kular ruh ban mang ia ka pisa na ka World Bank.
