Nongpoh, Risaw 04 : Ka Dorbar Shnong Mawsmai 11 Mer, kala dawa ban weng noh mardor ia ka khyrdop khrong khajna be-ain jong ka kynhun ki nongkhrong pisa bein na Assam (Syndicate) kaba don ha ka thain Jorabat.
Kane ka jingdawa kala mih hadien ka ki jingkulmar bad ki huri hura kiba la pynmih na kane ka khyrdop kaba la buh hapdeng ka jingbym shngain ia ka iaid ka ieng jong ki riew paidbah khamtam ha ka por mynmiet.
Kane kala jia ruh hadien ka jingshah shoh ki katto katne ngut ki samla na ka Shnong ha ki briew kiba kynnoh ba dei ki nongkhrong pisa beain ba a Assam. Kane ka jingjia kala jia ha ka 2 tarik Risaw ha Jorabat.
La kynnoh ba kine ki nong Assam kila bom naphang da ki bitor kyiad bad ki dieng ia ki samla haduh ba kila mynsaw jur.
Ka Dorbar Shnong hapoh ka jingialam u Bah Petrus Shakwa bala synran lang da ki nongialam ka FKJGP-Byrnihat Circle, kila lum ia ka jingialang ha Jorabat ban iamir jingmut ia kaei ka sienjam ba donkam ban leh halor kane ka khyrdop.
Kane ka jingialang kala rai ban leit buh da ka jingujor sha u Deputy Commissioner ka Ri-Bhoi District ba un shim ia ka sien jam ha kaban leit pynpra bad kyndang noh ia kane ka khyrdop bad ban pyrrkhing ia ki briew ba kin khrong pisa be-ain ha kane ka thain.
