Shillong Nailar 09: Ka Lympung ki Seng Kynthei hynne ka sngi Balang, kala dawa ia u Chief Executive Member (CEM) ka Khasi Hills Autonomous District Council (KHADC) Bah Pyniaid Sing Syiem ban pynmih daka jingbthah sha baroh ki Dorbar Shnong ba kin ailad noh ia ki President bad Secretary jong ki Seng Kynthei hala ki shnong ki thaw ba kin don bynta lang ha ka Executive Committee jong ki Dorbar Shnong.
“Kum ka Lympung ki Seng Kynthei ngi la kyrpad ia u CEM ka KHADC, ban pynmih iaka jingbthah ba ki Dorbar Shnong kidei ban kynthup lang noh ia ki President bad Secretary jong ki Seng Kynthei ha ka Executive Committee jong ka Dorbar Shnong khnang ba kin ioh lad ban iatai bad ai jingmut ia ki mat kiba iadei bad ki kynthei bad ka imlang sahlang” ong ka Secretary ka LSK Kong TT Swer haba iakren bad ki nongthoh khubor.
Kane ka nongialam kala pynshai ba ka Synjuk kam shym la dawa satia ban ailad iaka Kynthei ba kin long Rangbah Shnong hynrei ka jingdawa kadei thik tang ban kynthup lang noh ia ki kynthei ha ki Executive Committee jong ki Dorbar Shnong ba kin iatreilang bad ki rangbah ban pyniaid ia ki kam shnong kam thaw bad ban ai jingmut ha kiba bun ki liang.
Kala pyntip ba kila don ki shnong kiba ailad ia ki kynthei ban don bynta ha ki Executive Dorbar hynrei ki don ruh ki shnong ki bym ailad ia ki kynthei ban don ha ka Executive Dorbar.
Haba kylli, kane ka Secretary kala ong, ba ka long kaba eh ia ka Kynthei ban bat iaka kam Rangbah Shnong namar ba kadei ka kam kaba khia bha hynrei dei pat ban kynthup lang ia ki kynthei ha ka jingshim rai ha kaba iadei bad ki kam pyniaid shnong bad khamtam haba ki seng kynthei kila mih shakhmat ban ialeh ban rat dyngkhong ia ki kam sniew bad ban wanrah iaka shongsuk shongshngain ha ki shnong ki thaw da kaba iatreilang bad ka Dorbar Shnong.
Ki nongialam jong ka Lympung kila ong, ba ka KHADC kadei ban shimkhia ia kane ka mat katkum ka jingkylla bad ka jingiaid ka por namar haba don kino kino ki jingjia kiba iadei bad ki kynthei, dei ki seng kynthei kiba mih shakhmat ban shimkhia namar kan long kaba eh ia ki shynrang briew ban leh eiei pyrshah ia ki kynthei bad ki khun samla ki kham ngeit ia ki kynthei kiba kren da ka ktien kaba jem.
“U CEM ula kular ban shimkhia ia kane ka mat jingdawa bad ban khmih katkum ba shah ka aiñ namar kane kadei kaei kaei kaba dang long thymmai bad watla ki don ki Dorbar shnong kiba la kynthup ia ki Kynthei ha ki Executive Committee hynrei kiba bun hi ki shnong kim pat leh satia ia kane” ong ka Kong Theilin Phanbuh kaba long ka President jong ka Lympung.
Kala ong ba ka long kaba donkam ba ka KHADC kan pynmih iaka jingpynbna khnang ba kan long kaba treikam ryntih ha baroh ki Dorbar Shnong kiba hap ha u pud u sam jong ka KHADC.
