Shillong, Iaiong 04: U President ka Khasi Student Union (KSU) samla Lambokstar Marngar ula pyntip ba ka KSU kala dep ai jingmut sha ki MLA bad sha ka Sorkar Jylla ba dei ban iakren halor ka Roster System ba kan treikam ym naduh u snem 1972 hynrei dei ban sdang beit naduh ka sngi bala mynjur iaka Roster.
Haba kren sha ki lad pathai khubor u bah Lambok ula ong ba lada khyllie bad lada pyntriekam iaka Roster System naduh u snem 1972, ka jingduh nong kaba khraw kan dei hi iaki khun samla na rilum Khasi-Jaintia bad dei namar kane ka seng ka dawa naka sorkar ban pyntreikam beit iaka Roster System naduh ka sngi bala ioh ka jingmynjur naka kynhun Myntri Sorkar.
U bah Lambok ula ong ba ki paidbah ka jylla kim dei ban sngewthuh bakla ba ka KSU ka sngap jar halor kane ka mat hynrei naka liang ka seng naduh ki sngi bala mih kane ka mat, kala dep ban iakren bad ki riew paw khmat bad ki nongthaw ain halor kane ka kam.
“Ngam pat lah ban iathuh kaei ka lynti iaid jong ka KSU halor ka Roster System hynrei ka KSU kala iaid naka bynta ka jingbha bad ka jingmyntoi ki khun samla Khasi-Jaintia” ong u bah Lambok.
U bah Lambok ula ong, kane ka jingpyrshah iaka jingpyntreikam iaka Roster System naduh u snem 1972 kam dei ka mat tang jong ka KSU hynrei kadei ka mat jong baroh ki paid Khasi Jaintia namar kadei ka kam iap kam im jong ka jaitbynriew baroh kawei.
“Ia kane ka kam ym dei ban shu ia shim rai kyrkieh hynrei dei ban it ia ki lad lynti kumno ban ai jingmut iaka sorkar hynrei ka KSU ka kwah ban kren shai ba u paidbah ka jylla ula jied iaki nongthaw ain, hato kam dei mo ka kamram jong ki ban pyrkhat bha halor kane ka kam” ula ong.
U bah Lambok ula ong ba ka seng kala dep ban pynsngew sha ki nongmihkhmat halor ka Roster System bad lada ki nongmihkhmat ki rai bakla halor kane, baroh ki nongmihkhmat kin hap bah khlieh lada mih kano kano ka kynrum kynram kaba lah ban ktah iaka shong suk shong shngain hapoh ka jylla baroh kawei.
Pule lang ia kane: Sngewskhem ka HSPDP ban jop biang ka seng ia ka elekshon MLA ha Sohiong
