Shillong, Jymmang 15: Ka Khasi Student Union (KSU) West Jaintia Hills hynne ka sngi kala dawa naka sorkar jylla ban pynbeit shwa iaka jingeh jong ki nongshong shnong ka thain Khanduli hashuwa ban bteng iaka jingiakren pynbeit pud bad ka jylla Assam.
Kane ka jingdawa kala wan hadien ba ki paidbah nong shong shnong ka thain Khanduli West Jaintia Hills kila shah thombor bad kila shah khang lynti ban leit sha ki jaka rep ha ki Karbi ka jylla Assam.
Haba kren sha ki lad pathai khubor u President ka KSU West Jaintia Hils samla Laitphar Syngkrem ula kam ba ka jin giakynad hapdeng ki Khasi-Pnar bad ki jaitbynriew Karbi kala mih namar ka jingpynieng ka Karbi Anglong Autonomous Council (KAAC) iaka khyrdop lum khajna hapoh u pud u sam ka jylla Meghalaya.
U samla Laitphar ula ong ba kane ka jingmih ka kyrdop lum khajna bad ka jingshah khang lynti ki nongrep naka shnong Khanduli ka la wanrah jingeh iaki paidbah namar ki hap ban siew khajna nalor ba kim ioh ban leit sha ki jaka rep.
“Hadien ka jingweng noh iaka khyrdop lum khajna jong ka KAAC ha Khanduli, ka jingiakynad kala jah noh hynrei kynsan kynsan ka jingiakynad kala sdang biang haba Karbi kila wiang ding iaka iingtrep bad khang lynti syndon iaki Khasi-Pnar ban leit sha ki jaka rep watla ki jaka rep ki dang hap ha u pud u sam ka Meghalaya” la ong u samla Laitphar.
U samla Laitphar ula ong ba naka liang ka KSU bad ki paidbah ka thain khappud ki dawa ba ka sorkar Meghalaya kadei shim khia ia kane ka jingshah pyndik ki Khasi-Pnar kiba don hapoh ka shnong Khanduli West Jaintia hills namar kane ka jingshah pyndik ki paradoh parasnam ka dang bteng haduh mynta mynne.
Ula ong ruh ba naka liang ka seng kala iakynduh iaki bor district ka West Jaintia hills bad Karbi Anglong hynrei haduh mynta, ki Khasi-Pnar ki dang shah pyndik beit ha ki briew jong ka Assam.
“Nalor ka sorkar, ngi dawa ruh naka Jaintia Hills Autonomous District Council (JHADC) ba kan shimkhia ia kane ka jingeh ki paidbah ka thain Khanduli daka iakren bad ka sorkar Assam bad ka KAAC khnang ba ki nongrep naka shnong Khanduli kin lait naka jingshah pyndik” ula ong.
