Shillong, Nailur 14: Ka Khasi Student Union (KSU) Mawphlang Unit hynne ka sngi Palei, kala dawa na u Myntri ka tnat pule puthi Rakkam A Sangma ban pynsted noh shaid shaid iaki kam ba iadei bad ka jingtei iaka Mawphlang College naka bynta ban kyntiew iaka pule puthi hapoh kane ka thain.
Haba kren sha ki lad pathai khubor hadien ka jingiakynduh ia u Myntri, u General Secretary ka KSU Mawphlang samla Baniengskhem Kharbani ula iathuh ba iaka Mawphlang College la buh mawnongrim naduh 24 tarik Nailar 2017 naka bynta ban pynkha iaka Science & Commerce Stream Building hynrei haduh mynta ia kane ka kam la pynsangeh khlem kano kano ka jingpynshai.
U samla Baniengskhem ula iathuh ba naduh bala plie ia u maw nongrim, ki paidbah ka thain Mawphlang kila dap daka jingkmen bad daka jingkyrmen ba kane ka College kan kyntiew iaka pule puthi bad naka liang ka Hima Mawphlang ruh kala ai ei ka jaka kaba heh haduh 20 acre ban tei ia kane ka College.
Ula iathuh ba ka tnat Ministry of DoNER kala mynjur ban mang T.36.55 klur lyngba ka Central Financial Assistance (CFA) hapoh ka Non-lapsable Central Pool of Resources (NLCPR), ha kaba ka jinglut kan long 90:10 ban shna ia ki Building naka bynta ka Science & Commerce Stream.
“Ka jingdon jong ka Mawphlang College kan iarap iaki samla ka thain ban bteng iaki jingpule khamtam kito ki samla pule kiba wan naki longïing baduk. Hynrei ka long kaba sngewsih ban iohi ba kane ka kam kala shu sahkut bad dei namar kata, ka KSU ka kyntu ia u Myntri ban shim khia ia kane naka bynta ka jingmyntoi ki paidbah bad ki samla ka thain Mawphlang” long u samla Baniengskhem.
Haba kylli u samla Baniengskhem ula ong “Naka liang u Myntri ula kular ban shim khia bad un sa lum ia ka jingialang ban wan jingtip khambniah haba iadei bad ki daw ba pynsangeh shipor ban tei iaki Building jong ka Science & Commerce Stream jong ka Mawphlang College”.
